2026-cı ilin yanvar–iyul aylarında xəzinədarlıq orqanları tərəfindən 748 mindən çox ödəniş tapşırığı vaxtında və tam həcmdə icra olunub.
GDP xəbər verir ki, Maliyyə Nazirliyinin açıqladığı məlumatlara əsasən, cari ilin ilk yeddi ayında dövlət büdcəsinin gəlirləri 23 milyard 594,7 milyon manat təşkil edib. Bu göstərici proqnozu 855,9 milyon manat və ya 3,8 faiz üstələyib.
Dövlət büdcəsinin gəlirlərində ən böyük paylardan biri İqtisadiyyat Nazirliyi yanında Dövlət Vergi Xidmətinin xətti ilə daxil olan vəsaitlərin payına düşüb. Belə ki, hesabat dövründə vergi daxilolmaları 11 milyard 474,1 milyon manat təşkil edib ki, bu da proqnozdan 848,1 milyon manat və ya 8 faiz çoxdur.
İqtisadiyyat Nazirliyi yanında Əmlak Məsələləri Dövlət Xidməti üzrə daxilolmalar 32,9 milyon manata çataraq proqnozu 5,8 milyon manat və ya 21,5 faiz üstələyib. Sair daxilolmalar 427,8 milyon manat təşkil edib ki, bu da proqnoz göstəricisindən 150,6 milyon manat və ya 54,4 faiz çoxdur. Dövlət Neft Fondundan dövlət büdcəsinə nəzərdə tutulan 7 milyard 490 milyon manat həcmində transfert isə tam həcmdə icra olunub.
Eyni zamanda, Dövlət Gömrük Komitəsinin xətti ilə dövlət büdcəsinə 3 milyard 751,8 milyon manat vəsait daxil olub və proqnoz 99,9 faiz səviyyəsində yerinə yetirilib. Dövlət büdcəsindən maliyyələşən təşkilatların ödənişli xidmətlərindən əldə edilən daxilolmaların həcmi isə 418,1 milyon manat təşkil edib ki, bu da proqnozun 74,1 faizinə bərabərdir.
Hesabat dövründə dövlət büdcəsinin xərcləri 20 milyard 174,4 milyon manat məbləğində icra olunub. Bu göstərici ötən ilin eyni dövrü ilə müqayisədə 229,8 milyon manat və ya 1,2 faiz çoxdur.
Məlumata əsasən, 2026-cı ilin yanvar–iyul aylarında icmal büdcənin gəlirləri 28 milyard 841,8 milyon manat, xərcləri isə 23 milyard 742,4 milyon manat təşkil edib.
Mütəxəssislərin fikrincə, dövlət büdcəsinin gəlirlərinin proqnozdan yüksək olması vergi və digər mənbələr üzrə daxilolmaların artması, eləcə də maliyyə intizamının gücləndirilməsi ilə əlaqədardır. Bu tendensiya dövlət maliyyəsinin dayanıqlılığının qorunmasına və sosial-iqtisadi proqramların maliyyələşdirilməsinin davamlı şəkildə təmin edilməsinə əlverişli şərait yaradır.