2025-ci ilin yanvar-avqust ayları üzrə investisiya şirkətlərinin ümumi bazar həcmi 67,9 milyard manat təşkil edib ki, bu da ötən ilin eyni dövrü ilə müqayisədə 41,2%-lik artım deməkdir.
GDP xəbər verir ki, lider mövqeyini qoruyan PAŞA Kapital İnvestisiya Şirkəti 28,4 milyard manatlıq əməliyyat həcmi ilə bazarın 41,8%-ni əhatə edib. Bu göstərici şirkətə əvvəlki illə müqayisədə 3,7 faiz bəndi əlavə bazar payı qazandırıb. İkinci yerdə qərarlaşan ABB İnvest İSK isə 24 milyard manata yaxın dövriyyə ilə 35,3%-lik bazar payına malik olub. Lakin şirkətin bazar payı ötən illə müqayisədə 0,5 faiz bəndi azalıb.
Üçüncü sırada yer alan CPM-İnvest İSK 3,48 milyard manatlıq əməliyyat həcmi ilə bazarın 5,1%-ni tutaraq, əvvəlki ildən 0,7 faiz bəndi daha çox pay əldə edib. Dördüncü pillədəki Assist Finance İSK 3,08 milyard manatlıq göstərici ilə 4,5%-lik bazar payına malik olub, lakin bu, ötən illə müqayisədə 4,1 faiz bəndi azalma deməkdir.
Beşinci sırada yüksəlişi ilə diqqət çəkən Xalq Kapital İSK qərarlaşıb. Şirkətin dövriyyəsi 1,85 milyard manat təşkil edib və bazar payı 0,6%-dən 2,7%-ə qalxaraq 2,1 faiz bəndi artıb. Altıncı yerdə olan İnvest-Az İSK 1,64 milyard manatlıq nəticə ilə 2,4%-lik bazar payı qazanıb və ötən illə müqayisədə 0,7 faiz bəndi irəliləyiş göstərib.
Siyahının yeddinci pilləsində Unicapital İSK qərarlaşıb. Şirkət 1,45 milyard manatlıq dövriyyə ilə 2,1%-lik bazar payına sahib olsa da, bu göstərici əvvəlki illə müqayisədə 2,8 faiz bəndi azalıb. Onu 1,3%-lik bazar payı ilə Capital Partners İSK izləyir. Şirkətin payı 0,1 faiz bəndi azalaraq sabitlikdən bir qədər geri qalıb.
Doqquzuncu yeri tutan Troni İSK 529 milyon manatlıq əməliyyat həcmi ilə bazarın 0,8%-ni təşkil edib. Bu şirkət əvvəlki ildə cəmi 0,005%-lik paya malik olduğu halda, 2025-ci ildə bazar payını 0,8 faiz bəndi artıraraq kəskin yüksəliş göstərib.
Daha aşağı sıralarda isə ciddi geriləmələr müşahidə olunub. Belə ki, CFI Financial İSK 199 milyon manatlıq dövriyyə ilə bazarın 0,3%-ni tutaraq əvvəlki illə müqayisədə 4 faiz bəndi itirib. İnno Kapital İSK isə 183 milyon manatlıq əməliyyat həcmi ilə 0,3%-lik payı sabit saxlayıb. Siyahının son pilləsində qərarlaşan MFX Trading İSK 148 milyon manatlıq nəticə ilə bazarın 0,2%-ni təşkil edib və bu, ötən illə müqayisədə 0,5 faiz bəndi azalma deməkdir.
Beləliklə, 2025-ci ilin ilk səkkiz ayı göstərir ki, bazarda iri oyunçular – PAŞA Kapital və ABB İnvest üstün mövqelərini qorumaqla yanaşı, yeni şirkətlər də bazar payını artırmağa nail olublar. Xüsusilə, Xalq Kapital və Troni kimi şirkətlərin sürətli yüksəlişi rəqabətin gücləndiyini nümayiş etdirir.
