“Meta” Azərbaycanda qüvvəyə minən yeni əlavə dəyər vergisi (ƏDV) qaydaları ilə əlaqədar Dövlət Vergi Xidmətində ƏDV qeydiyyatını tamamlamaq prosesinə başlayıb.
GDP xəbər verir ki, bu barədə şirkətin biznes tərəfdaşlarına göndərdiyi bildirişdə məlumat verilib.
Bildirilib ki, qeydiyyat prosesi çərçivəsində Azərbaycandakı reklam hesablarının sahiblərindən “Ad Account Settings” bölməsində Vergi Ödəyicisinin Eyniləşdirmə Nömrəsini (VÖEN) yeniləmələri tələb olunur.
“Meta” qeyd edib ki, sistemdə “Sold To” ünvanı Azərbaycan olaraq göstərilən və etibarlı VÖEN təqdim etməyən istifadəçilərin “Facebook” reklamlarının alınması xərclərinə qüvvədə olan 18%-lik dərəcə ilə ƏDV tətbiq edilə bilər.
VÖEN-i olan reklamverənlərdən müvafiq məlumatı reklam hesablarının ödəniş parametrlərində yerləşən “Taxpayer ID Number” bölməsinə daxil etmələri istənilib.
Şirkət məsələ ilə bağlı əlavə dəyişiklik və yeniliklər barədə tərəfdaşlarını məlumatlandıracağını açıqlayıb.