Bakı Fond Birjasının repo bazarında uzunmüddətli əməliyyatların azalması tariflərin ödəniş strukturunda edilən dəyişikliklərdən sonra müşahidə olunub.
GDP xəbər verir ki, bunu Bakı Fond Birjasının (BFB) maliyyə analitiki Nərmin Bayramlı bildirib.
Onun sözlərinə görə, 2025-ci ildən BFB-də repo əməliyyatları üzrə tarif strukturunda dəyişikliklər həyata keçirilib.
N.Bayramlı qeyd edib ki, repo beynəlxalq praktikada əsasən qısamüddətli likvidlik aləti hesab olunur və adətən bir həftəyədək müddəti əhatə edir.
“Biz də beynəlxalq standartlara uyğunlaşmaq üçün repo əməliyyatlarının tariflərində dəyişiklik etdik. Müddətdən asılı olaraq tariflər dəyişə bilirdi”, – analitik bildirib.
Onun sözlərinə görə, dəyişikliklərdən sonra bazarın müddət strukturunda fərq yaranıb və 7 gündən uzun repo əməliyyatlarının sayı azalıb.
N.Bayramlı vurğulayıb ki, dəyişiklik tariflərin qiymətinin artırılması deyil, ödəniş strukturunun dəyişdirilməsi ilə bağlı olub.
O əlavə edib ki, repo bazarında əqdlərin sayı artsa da, ümumi əməliyyat həcmində böyük dəyişiklik müşahidə olunmayıb.