PAŞA Kapital İnvestisiya Şirkəti 2024-cü ilin yanvar-oktyabr ayları ərzində Azərbaycan maliyyə bazarındakı mövqeyini daha da möhkəmləndirməyə müvəffəq olub.
GDP xəbər verir ki, bu barədə Bakı Fond Birjasında ticarət olunan bazarlar üzrə birja üzvlərinin dövriyyələri ilə bağlı aylıq hesabatda məlumat verilib.
Şirkətin həyata keçirdiyi ümumi əməliyyatların həcmi 2023-cü ilin yanvar-oktyabr ayları ərzində 15.93 milyard manatdan 2024-cü ilin müvafiq dövründə 21.47 milyard manata yüksələrək, 34.80% və ya 5.54 milyard manat artım nümayiş etdirib.
Bu əhəmiyyətli artım şirkətin bazar payının 28%-ə yüksəlməsinə səbəb olub.Bu göstərici ilə PAŞA Kapital İnvestisiya Şirkəti ölkədə yalnız bazarın 52.1%-inə nəzarət edən “ABB Invest İnvestisiya Şirkəti” QSC-dən geri qalır.
PAŞA Kapital İnvestisiya Şirkəti Azərbaycan Respublikasının Mərkəzi Bankının (ARMB) qiymətli kağızları üzrə əməliyyatlarda 2024-cü ildə əvvəlki illə müqayisədə 32.32% azalma qeydə alınıb. Belə ki, 2023-cü ildə 2.01 milyard manat olan əməliyyat həcmi 2024-cü ildə 1.36 milyard manata enib. Buna baxmayaraq, broker şirkəti bu seqmentdə 58.91%-lik bazar payı ilə dominant mövqeyini qoruyub saxlayıb.
Dövlət istiqrazları seqmentində də cüzi azalma müşahidə edilib. PAŞA Kapital İnvestisiya Şirkəti tərəfindən bu seqmentdə aparılan əməliyyatların həcmi 2023-cü ildə 3.88 milyard manat olduğu halda, 2024-cü ildə 3.76 milyard manata enərək 2.93% azalma nümayiş etdirib. Lakin broker şirkəti bu seqmentdə də 52.53%-lik bazar payı ilə lider mövqeyini qoruyub saxlamağa nail olub.
Korporativ istiqrazlar seqmentində PAŞA Kapital müştərilərinin portfelində əhəmiyyətli artıma nail olub. 2023-cü ildə 349.11 milyon manat olan əməliyyat həcmi 2024-cü ildə 1.12 milyard manata yüksələrək 221.25%-lik kəskin artım göstərib. Bu artım broker şirkətinin müştərilərinin özəl sektor qiymətli kağızlarına olan marağının artdığını və bazarın bu seqmentində 35.81%-lik pay ilə əhəmiyyətli mövqe tutduğunu göstərir.
Səhm bazarında da müsbət dinamika müşahidə edilib. 2023-cü ildə 1.44 milyon manat olan əməliyyat həcmi 2024-cü ildə 2.90 milyon manata yüksələrək 101.48% artım göstərib. Bu seqmentdə şirkətin bazar payı 1.85% təşkil etsə də, əməliyyat həcminin artımı İnvestisiya şirkətinin kapital bazarlarında artan aktivliyini əks etdirir.
Repo əməliyyatlarında artım qeydə alınıb. 2023-cü ildə 9.69 milyard manat olan əməliyyat həcmi 2024-cü ildə 15.22 milyard manata yüksələrək 57.12% artım göstərmişdir. Bu seqmentdə broker şirkətinin 21.97%-lik bazar payı, onun müştərilərinin qısamüddətli likvidlik ehtiyaclarının qarşılanmasında mühüm rol oynadığını göstərir.
Broker şirkətinin əməliyyat aktivliyində də müsbət dinamika müşahidə edilib.. PAŞA Kapital İnvestisiya Şirkətiin həyatav keçirdiyi əməliyyatların sayı 2023-cü ildəki 5,381-dən 2024-cü ildə 6,115-ə yüksələrək 13.64% artıb. Bu artım şirkətin müştəri bazasının genişlənməsini və bazarda onun xidmətlərinə olan tələbatın artmasını əks etdirir.