Azərbaycan Dövlət Neft Şirkəti (SOCAR) İtaliyadakı yanacaqdoldurma məntəqələrində yanacağın qiymətini aşağı salacaq.
GDP.az xəbər verir ki, bu barədə “Bloomberg” məlumat yayıb.
Məlumata görə, SOCAR-a məxsus “Italiana Petroli” (IP) şəbəkəsində benzin və dizel yanacağının qiymətlərinin aşağı salınması nəzərdə tutulur.
“Bloomberg” yazır ki, SOCAR-ın bu addımı İtaliya Baş naziri Corcia Meloni hökumətinin enerji şirkətlərinin yüksək gəlirlərinə əlavə vergi (“windfall tax”) tətbiqi imkanını müzakirə etdiyi vaxta təsadüf edir.
İtaliyanın Baş naziri Corcia Meloni SOCAR-ın qərarını yüksək qiymətləndirib. O, bununla əlaqədar Azərbaycan Prezidenti İlham Əliyevə və SOCAR prezidenti Rövşən Nəcəfə təşəkkürünü bildirib.
Meloni SOCAR-ın qərarını İtaliyada ailələrin və istehlakçıların artan yanacaq xərclərindən qorunmasına töhfə verən mühüm addım kimi dəyərləndirib.
SOCAR-ın qərarı İtaliyanın “Eni” şirkətinin analoji addımından sonra açıqlanıb. “Eni” sentyabrın 28-dən etibarən bir ay müddətinə yanacağın qiymətinə yuxarı hədd müəyyənləşdirib. Şirkətin məntəqələrində benzinin maksimal qiyməti 1,99 avro/litr, dizelin qiyməti isə 2,19 avro/litr olacaq.
İtaliya hökuməti enerji və yanacaq qiymətlərinin artmasının əhaliyə təsirini azaltmaq üçün sektorda fəaliyyət göstərən şirkətlərlə bağlı əlavə fiskal tədbirləri də nəzərdən keçirir.