SOCAR “Azəri-Çıraq-Günəşli” (AÇG) layihəsində Yaponiyanın “ITOCHU” korporasiyasına məxsus 3,65 faizlik iştirak payını alıb.
GDP xəbər verir ki, Şirkətin məlumatına görə, iştirak payının alınmasına dair müvafiq sənədlər imzalanıb. Alqı-satqı əməliyyatı qanunvericiliyin tələblərinə, SOCAR-ın daxili normativ qaydalarına və müqavilə üzrə mövcud tənzimləyici öhdəliklərə uyğun həyata keçirilib.
Əməliyyatdan əvvəl “ITOCHU” korporasiyası AÇG layihəsində 3,65 faiz iştirak payına malik olub. Sövdələşmənin başa çatması ilə SOCAR-ın layihədəki iştirak payı 31,65 faizdən 35,3 faizə yüksəlib.
SOCAR-ın prezidenti Rövşən Nəcəf bildirib ki, AÇG layihəsi uzun illərdir Azərbaycanın və regionun enerji təhlükəsizliyinə mühüm töhfə verir.
Onun sözlərinə görə, cari ildə AÇG yataqlar blokundan ilk sərbəst təbii qaz hasilatının başlanması layihənin gələcək inkişafı və Azərbaycanın qaz potensialının artırılması üçün yeni imkanlar yaradır.
Rövşən Nəcəf layihənin həyata keçirilməsində uzun illər ərzində oynadığı rola və səmərəli tərəfdaşlığa görə “ITOCHU” korporasiyasına təşəkkürünü bildirib. O, layihənin bundan sonra da tərəfdaşların birgə səyləri, yüksək əməliyyat standartları və qarşılıqlı etimad əsasında uğurla davam etdiriləcəyinə əminliyini ifadə edib.
“ITOCHU” korporasiyasının baş əməliyyat direktoru, Enerji və enerji həlləri bölməsinin baş icraçı direktoru Tetsuya Yamada isə bildirib ki, şirkət 1996-cı ildə Azərbaycana sərmayə yatıran ilk Yaponiya şirkəti olduqdan sonra AÇG layihəsi və enerji sahəsində digər investisiyalar vasitəsilə SOCAR ilə möhkəm tərəfdaşlıq qurub.
O qeyd edib ki, AÇG-dəki aktivin SOCAR-a ötürülməsi “ITOCHU”nun strateji prioritetlərini və SOCAR ilə əməkdaşlığı daha da dərinləşdirmək niyyətini əks etdirir.
Tetsuya Yamadanın sözlərinə görə, bu satış “ITOCHU”nun Azərbaycandan çıxması demək deyil, əksinə, tərəfdaşlıqda yeni mərhələnin başlanğıcıdır. Azərbaycan şirkətin investisiya və ticarət fəaliyyəti üçün mühüm bazar olaraq qalacaq.
“ITOCHU” SOCAR ilə əməkdaşlığın daha da gücləndirilməsini, Azərbaycanda və beynəlxalq bazarlarda yeni biznes imkanlarının birgə qiymətləndirilməsini planlaşdırır.
SOCAR Cənubi Qafqazın ən böyük inteqrə olunmuş enerji şirkəti olaraq enerji resurslarının hasilatı, emalı və paylanması sahələrində fəaliyyət göstərir.
1858-ci ildə təsis edilmiş “ITOCHU” isə Yaponiyanın ən iri ticarət və investisiya konqlomeratlarından biridir. Şirkətin təxminən 61 ölkədə 90 ofisi fəaliyyət göstərir.