Azərbaycan Mərkəzi Bankı pul siyasətinin modernizasiyası çərçivəsində faiz dərəcələrinin ötürücülüyünün gücləndirilməsini, maliyyə bazarlarının dərinləşdirilməsini, proqnozlaşdırma imkanlarının təkmilləşdirilməsini və kommunikasiyanın inkişafını prioritet hesab edir.
GDP bu barədə Mərkəzi Bankın sədri Taleh Kazımov “Global Finance” jurnalına müsahibəsində bildirib.
Onun sözlərinə görə, əsas istiqamətlərdən biri Mərkəzi Bankın faiz qərarlarının bazar faiz dərəcələrinə təsirinin gücləndirilməsidir.
Digər prioritet banklararası təminatsız pul bazarının istinad faiz dərəcəsi olan AZIR-ə əsaslanan maliyyə alətlərinin çeşidinin genişləndirilməsi və gəlirlilik əyrisinin formalaşdırılması vasitəsilə kapital və pul bazarlarının dərinləşdirilməsidir.
T.Kazımov bildirib ki, 2022-ci ilin sentyabrından etibarən Azərbaycanda aktiv banklararası pul bazarı formalaşdırılıb. AZIR artıq bir ildən çoxdur ki, ikinci dərəcəli əməliyyat hədəfi kimi istifadə olunur.
Mərkəzi Bankın sədri qeyd edib ki, AZIR ilə uçot dərəcəsi arasındakı fərq azalıb. Avropa Yenidənqurma və İnkişaf Bankının ötən il birbaşa AZIR-ə istinad edən dəyişən faizli istiqrazlar buraxması da bu göstəricinin etibarlılığına dəstək kimi qiymətləndirilir.
Üçüncü prioritet məlumat analitikası və süni intellekt texnologiyalarından istifadə etməklə makroiqtisadi proqnozlaşdırmanın təkmilləşdirilməsidir.
T.Kazımov dördüncü prioritet kimi kommunikasiyanın əhəmiyyətini vurğulayıb.
“Etibarlılıq mərkəzi bankın ən dəyərli aktividir”, – deyə o bildirib.