ABB xarici valyutada vəsait cəlb etmək üçün beynəlxalq istiqraz buraxılışına hazırlaşır.
GDP xəbər verir ki, bunu bankın İdarə Heyətinin sədri Abbas İbrahimov “Dayanıqlılıq Hesabatı”na dair keçirilən mətbuat konfransında bildirib.
Onun sözlərinə görə, bankın balansında nağd vəsaitlərin azalması əsasən iri həcmli vəsait çıxışları və aktiv portfelin genişlənməsi ilə bağlıdır. ABB son dövrdə xüsusilə korporativ, pərakəndə və ipoteka kredit portfellərinin böyüməsinə ciddi investisiyalar edib və bu artımın maliyyələşdirilməsi üçün əlavə resurslara ehtiyac yaranıb. Eyni zamanda, bankın ümumi likvidliyi həm manat, həm də xarici valyutada yüksək səviyyədə qalır – manat likvidliyinin idarə edilməsində banklararası bazar mühüm rol oynayır və ABB cari ehtiyaclarını məhz bu bazar vasitəsilə də qarşılayır.
Xaricdən vəsait cəlbi məsələsinə gəlincə, Abbas İbrahimov bildirib ki, ABB daha əvvəl təxminən 5,5 faiz civarında maliyyə resursu cəlb edib. Bank gələcəkdə 300-500 milyon ABŞ dolları həcmində vəsaiti daha sərfəli şərtlərlə cəlb etməyə çalışacaq və əgər 5,5 faizədək dərəcə ilə cəlb etmək mümkün olarsa, bu, bank üçün məqbul sayılır. Bu prosesdə ABB-nin beynəlxalq reytinqlərinin yüksəlməsi və banka olan etimadın artmasının mühüm rol oynayacağı gözlənilir.
Bank rəhbəri qeyd edib ki, ABB artıq Avropa, ABŞ və Körfəz ölkələrindəki tərəfdaşlarına müraciətlər göndərib. Xarici istiqraz buraxılışı prosesində beynəlxalq təşkilatların və təşkilatçı bankların iştirak edəcəyi nəzərdə tutulur – Citibank daxil olmaqla müxtəlif beynəlxalq maliyyə institutları ilə ilkin təmaslar qurulub. Hazırda 10 xarici kontragent banka sorğular göndərilib və təqdim olunacaq şərtlər yaxın aylarda qiymətləndiriləcək.
ABB-nin İdarə Heyətinin sədri vurğulayıb ki, bank daxili bazarda dollar istiqrazları yerləşdirməyi planlaşdırmır, çünki məqsəd ölkə daxilində dollarlaşmanı təşviq etməmək və xarici valyutada resursları əsasən beynəlxalq bazarlardan cəlb etməkdir. Əgər təqdim olunan şərtlər bankın maraqlarına uyğun gələrsə, ABB cari ilin sonuna doğru – böyük ehtimalla İngiltərədə qeydiyyatdan keçmiş istiqraz buraxılışı həyata keçirəcək. Bununla bağlı yekun qərar isə cari ilin birinci yarısında qəbul ediləcək.
Abbas İbrahimov əlavə edib ki, ABB üçün bu proses yalnız maliyyə cəlbi deyil, həm də beynəlxalq istiqraz bazarındakı təcrübənin yenilənməsi baxımından əhəmiyyət daşıyır. Onun sözlərinə görə, həm Azərbaycan dövləti, həm də iri yerli təşkilatlar uzun müddətdir beynəlxalq istiqraz bazarına çıxış etmədiyi üçün bank bazar şərtlərini və investor marağını yenidən qiymətləndirmək niyyətindədir. Hər halda, xarici vəsait cəlbinə təcili ehtiyac olmasa da, bank uzunmüddətli və sərfəli şərtlərlə əməkdaşlığa hazır olduğunu bütün tərəfdaşlarına çatdırıb.