Azərbaycan Mərkəzi Bankının (AMB) sədr müavini Vüsal Xəlilov açıqlayıb ki, ötən il bank sektoru dövlət qurumlarından məlumat əldə etmək üçün 23,8 milyon manat vəsait xərcləyib. Bu xərc rəqəmsal transformasiyanın sürətlənməsinə əngəl törədən amillərdən biri kimi qiymətləndirilir.
GDP xəbər verir ki, Xəlilov bu barədə İqtisadi İslahatların Təhlili və Kommunikasiya Mərkəzinin təşkilatçılığı ilə keçirilən “Rəqəmsal arxitektura: Proqram idarəetməsi və nəticəəsaslı yanaşma” mövzusunda dəyirmi masada çıxışı zamanı məlumat verib.
AMB sədr müavini vurğulayıb ki, sektor üzrə aparılan sorğular da göstərir ki, dövlət məlumatlarının ödənişli əsaslarla təqdim olunması bankların rəqəmsallaşma yolunda ciddi çətinliklərlə üzləşməsinə səbəb olur. O qeyd edib ki, region ölkələrində dövlət informasiya ehtiyatlarının müəyyən müddət ərzində maliyyə institutlarına pulsuz verilməsi təcrübəsi mövcuddur.
Xəlilov əlavə edib ki, hazırda bu məsələ ilə bağlı müzakirələr aparılır və Azərbaycanda da analoji addımın atılması maliyyə sektorunda rəqəmsallaşma proseslərini əhəmiyyətli dərəcədə sürətləndirə bilər. Onun sözlərinə görə, ödənişsiz məlumat mübadiləsi həm bankların operativliyini artıracaq, həm də sektorun innovasiya potensialını daha tam üzə çıxarmağa imkan yaradacaq.