Süni intellektdən istifadə məhsul yaradılmasını əhəmiyyətli dərəcədə sürətləndirib.
GDP xəbər verir ki, bunu Bakıda keçirilən X Beynəlxalq Maliyyə və Bankçılıq Sammitində Azərbaycan Mərkəzi Bankının (AMB) İdarə Heyətinin üzvü Vüsal Xəlilov bildirib.
O rəqəmsallaşma və süni intellekt məsələsinə də toxunaraq bildirib ki, bu il fevralın 11-də Prezident İlham Əliyevin sədrliyi ilə keçirilmiş müşavirədə vurğulandığı kimi, rəqəmsallaşma və süni intellekt ölkəmizin əsas prioritetlərindən biri kimi müəyyən edilib: “Maliyyə sektoru isə ölkənin ən çox rəqəmsallaşmış sahələrindən biri olaraq bu istiqamətləri öz strategiyalarında və təşəbbüslərində nəzərə alır. Hesab edirik ki, rəqəmsallaşma və süni intellekt yaxın gələcəkdə bütün təşkilatlarda geniş tətbiq olunacaq. Bu gün keçirilən sammit çərçivəsində müzakirə olunan mövzular da bunu bir daha təsdiqləyir”.
V. Xəlilov qeyd edib ki, AMB da öz fəaliyyətində süni intellektdən istifadənin genişləndirilməsi istiqamətində ardıcıl addımlar atır: “Xüsusilə, bütün təhlükəsizlik tələbləri nəzərə alınmaqla məhsul yaradılmasında əhəmiyyətli nəticələr əldə etmişik, proseslərin sürətləndirilməsinə nail olmuşuq. Bu inkişaf fonunda AMB-nin roluna da yeni baxış formalaşır. Dünyada müşahidə olunan tendensiyalar göstərir ki, mərkəzi banklar artıq yalnız ənənəvi tənzimləyici funksiyasını yerinə yetirmir, eyni zamanda rəqəmsal maliyyə ekosisteminin formalaşdırılmasına və inkişafına rəhbərlik edən qurumlar kimi çıxış edirlər”.