“Son il ərzində investisiya şirkətlərinin balans göstəricilərində azalma müşahidə olunmuşdur. 2024-cü ilin sonu ilə müqayisədə investisiya şirkətlərinin aktivləri 34% (61 mln. manat) azalaraq 121 mln. manat, öhdəlikləri isə 50% (64 mln. manat) azalaraq 64 mln. manat təşkil etmişdir. İnvestisiya şirkətlərinin aktiv və öhdəliklərindəki azalmanı şərtləndirən əsas amil yüklü maliyyə aktivlərinin (repo/əks-repo əməliyyatları) həcminin azalması olmuşdur.”
GDP xəbər verir ki, bu, Azərbaycan Mərkəzi Bankının 2025-ci ilin sonuna olan məlumatlar əsasında hazırlanmış Maliyyə Sabitliyi Hesabatında bildirilir.
Qeyd edilib ki, il ərzində investisiya şirkətlərinin müştəri aktivləri genişlənməkdə davam etmişdir. 2025-ci il ərzində investisiya şirkətlərinin müştəri aktivləri 35% (668 mln. manat) artaraq il sonuna 2.6 mlrd. manata çatmışdır. Müştəri aktivlərində artımın əsas drayveri xarici bazarda broker xidmətləri olmuşdur. Belə ki, xarici bazarda broker xidmətləri üzrə müştəri aktivləri 31% (580 mln. manat) artaraq 2.2 mlrd. manat təşkil etmişdir.
İnvestisiya şirkətlərinin xalis mənfəətində azalma müşahidə olunmuşdur. Belə ki, 2025-ci il ərzində investisiya şirkətlərinin xalis mənfəəti 32% (2.5 mln. manat) azalaraq il sonuna 5.4 mln. manat olmuşdur. İnvestisiya şirkətlərinin xalis mənfəəti artan haqq və komissiya, əmək haqqı və sosial xərclər, habelə inzibati xərclər fonunda azalmışdır.
İnvestisiya şirkətlərinin kapital mövqeyi komfort zonadadır. 2025-ci ilin sonuna investisiya şirkətləri üzrə məcmu kapital 55.1 mln. manat, tələb olunan kapital isə 7.4 mln. manat təşkil etmişdir ki, bu da investisiya şirkətlərinin kifayət qədər kapital buferinə sahib olduğunu göstərir