Bu mərhələdə bank investorlara hər biri 5 milyon manat həcmində olmaqla iki növ istiqraz təklif edir. Bir illik istiqrazlar üzrə illik gəlirlilik 9%, 2 illik istiqrazlar üzrə isə 10% olaraq müəyyən edilib. Hər iki istiqraz növü üzrə faiz ödənişləri rüblük həyata keçiriləcək.
GDP xəbər verir ki, investorların sifarişlərini yerləşdirməsi üçün nəzərdə tutulan müddət 2 həftədir. Bu müddət həm fərdi, həm də institusional investorlara qərar vermək üçün kifayət qədər çevik imkan yaradır.
Bankın açıqladığı ilkin cədvələ əsasən, istiqraz emissiyaları il ərzində bir neçə mərhələdə davam edəcək. 27 apreldə başlayan ikinci mərhələdən sonra üçüncü mərhələ may ayında, dördüncü mərhələ iyun ayında, beşinci mərhələ sentyabr ayında, altıncı mərhələ isə noyabr ayında təşkil olunacaq. Hər mərhələdə eyni qayda – 2 həftəlik sifariş toplama müddəti, hər istiqraz növü üzrə 5 milyon manat buraxılış həcmi, 1 və 2 il müddətli istiqrazlar, həmçinin rüblük faiz ödənişləri – qorunub saxlanılır.
Qeyd edək ki, bu tarixlər və şərtlər ilkin xarakter daşıyır və bazar şərtlərindən asılı olaraq dəyişə bilər.
ABB-nin əsas məqsədi investorlar üçün müntəzəm və asan əldə edilən investisiya imkanları yaratmaq, eyni zamanda ölkənin kapital bazarında davamlı fəallığı təmin etməkdir. Daimi emissiyalar vasitəsilə həm fərdi, həm də institusional investorların bazara marağının artırılması hədəflənir.
Xatırladaq ki, bank mart ayında keçirdiyi ilk istiqraz emissiyasını uğurla başa çatdırıb. Həmin mərhələdə ümumilikdə 10 milyon manat həcmində istiqraz yerləşdirilib, investor tələbi isə təklif olunan məbləği təqribən 5 dəfə üstələyib. Məhz bu yüksək maraq bankın sonrakı emissiya planlarını genişləndirməsinə səbəb olub.
İstiqrazlar və digər maliyyə məhsulları haqqında əlavə məlumat əldə etmək istəyənlər bankın filial və şöbələrinə, rəsmi internet səhifəsinə və ya Məlumat Mərkəzinə müraciət edə bilərlər. Yeni emissiyalar rəsmən elan olunduqca dəqiq tarixlər və şərtlər yenilənəcək.