Azərbaycan Mərkəzi Bankı (AMB) Maliyyə Sisteminin Yaşıllaşdırılması Üzrə Mərkəzi Banklar və Nəzarət Qurumları Şəbəkəsinə (NGFS) tamhüquqlu üzv olaraq qəbul edilib. Bu qərar ölkəmizin dayanıqlı maliyyə sahəsində beynəlxalq öhdəliklərinin gücləndirilməsi istiqamətində mühüm addım kimi dəyərləndirilir.
Tamhüquqlu üzv statusu çərçivəsində Mərkəzi Bank şəbəkənin işçi qruplarının fəaliyyətində fəal iştirak edəcək, iqlim ssenarisi təhlili, yaşıl maliyyə, iqlim stres-testləri, həmçinin dayanıqlılıq amillərinin pul siyasəti və prudensial nəzarət çərçivələrinə inteqrasiyası sahələrində aparılan kollektiv tədqiqatlara töhfə verəcək və bu tədqiqatların nəticələrindən faydalanacaq.
Mərkəzi Bankdan bildirilib ki, NGFS-ə qoşulma qurumun dayanıqlı maliyyə gündəliyinin – o cümlədən Yaşıl taksonomiyanın tətbiqi, yaşıl istiqraz bazarının formalaşdırılması və maliyyə sektorunda iqlim riskləri ilə bağlı açıqlamaların tətbiqinin dərinləşdirilməsini şərtləndirəcək. Bu üzvlük, həm də Mərkəzi Bankın Dayanıqlı Maliyyə üzrə Yol Xəritəsinin icrası istiqamətində əsas təşəbbüslərdən biri hesab olunur.
Qeyd edək ki, NGFS dünyanın müxtəlif ölkələrindən mərkəzi bankları və nəzarət orqanlarını birləşdirən qlobal şəbəkədir. Qurum maliyyə sektorunda ətraf mühit və iqlim risklərinin idarə olunmasının inkişafına töhfə vermək, qabaqcıl təcrübələrin paylaşılmasını təşviq etmək və dayanıqlı iqtisadiyyata keçidi dəstəkləmək məqsədi daşıyır.
Mərkəzi Bank qeyd edib ki, bu addım Azərbaycanın Paris İqlim Sazişi çərçivəsindəki milli öhdəlikləri və iqtisadiyyatın yaşıl, dayanıqlı inkişaf istiqamətində transformasiyası üzrə siyasəti ilə tamamilə uzlaşır. AMB bundan sonra da beynəlxalq maliyyə institutları ilə əməkdaşlığı inkişaf etdirərək qlobal çağırışlara uyğun siyasətlərin formalaşdırılmasını davam etdirəcək.