ABB 2025-ci ili rekord mənfəətlə başa vurub – səhmdarlara 200 milyon manat dividend təklif olunur. Azərbaycan Beynəlxalq Bankının (ABB) İdarə Heyətinin sədri Abbas İbrahimov müsahibəsində bankın 2025-ci ilin yekunları, qarşıdakı səhmdarlar yığıncağı, beynəlxalq genişlənmə planları və süni intellekt sahəsindəki yenilikləri açıqlayıb.
GDP müsahibəyə istinadən xəbər verir ki, ABB Maliyyə Qrupu 2025-ci ili 404,491 milyon manat xalis mənfəətlə başa vurub. Bu, bankın tarixində ən yüksək mənfəət göstəricisidir. Menecmentin təklifi ilə 7 may 2026-cı ildə keçiriləcək səhmdarların növbəti ümumi yığıncağında 200 milyon manat məbləğində dividend ödənişi müzakirəyə çıxarılacaq. Təklif qəbul olunarsa, səhmdarlar nominal qiymətdən 15,6 faiz dividend gəliri əldə edəcəklər. ABB son 8 ildir ardıcıl olaraq dividend ödəyir və iki ildir ki, gəlirlərini 30 mindən çox səhmdarı ilə bölüşür.
ABB-nin 2026-2028-ci illər strateji inkişaf planının əsas hədəflərindən biri coğrafi genişlənmədir. Bank Özbəkistanın maliyyə bazarına daxil olmaq niyyətindədir. Hədəf ölkənin özəl banklarından birində nəzarət səhm paketini əldə etməkdir. Abbas İbrahimov bu addımın Azərbaycan-Özbəkistan strateji tərəfdaşlığının dərinləşməsinə, həmçinin ABB-nin rəqəmsal innovasiyalarının təxminən 40 milyon əhalisi olan Özbəkistan bazarında tətbiqinə imkan yaradacağını vurğulayıb.
Son dövrlərdə manata inamın artması da nəzərə çarpır. Təkcə son 3 ayda ABB-də manatla depozitlərdə 235 milyon manat artım qeydə alınıb. Ölkənin bank sektorunda isə milli valyutada müddətli əmanətlər son 3 ildə 2,1 dəfə artaraq 7,5 milyard manata çatıb. Fiziki şəxslərin əmanətlərində dollarlaşma səviyyəsi 40 faizdən 31,1 faizə enib. ABB bu ildən manatda istiqrazlar buraxmağa başlayıb. Mart ayında fiziki şəxslərə üstünlük hüququ verməklə ilk emissiya keçirilib. Hər biri 5 milyon manat olmaqla 1 il və 2 il müddətinə 10 milyon manatlıq istiqraz buraxılışı uğurla baş tutub. Sifarişlərin həcmi təklif edilən məbləği təxminən 5 dəfə üstələyib. İnvestorların 98 faizdən çoxu ABB istiqrazlarını “ABB mobile” tətbiqi üzərindən, tam rəqəmsal təcrübə ilə əldə edib. 528 investor ABB istiqrazlarına sahib olub. Bank bu il ərzində davamlı tranşlarla ümumən 100 milyon manat məbləğində istiqraz emissiyasını planlayır.
ABB süni intellekt texnologiyalarına strateji investisiyalar edir. Bankın rəhbəri bunu artıq seçim yox, strateji zərurət adlandırır: “Çünki gələcəyin bankçılığı süni intellektlə qurulur”. ABB “Süni intellekt və Generativ süni intellekt” yol xəritəsini qəbul edib. Hazırda bankda müxtəlif istiqamətlər üzrə tətbiq olunan süni intellekt modellərinin sayı 180-ə yaxınlaşır. NVIDIA HGX B200 platforması əsasında Dell GPU yüksəkperformanslı hesablama infrastrukturunun formalaşdırılması prosesi gedir. Bu ilin əvvəlində AI-khan və AI-nur adlı süni intellekt köməkçiləri bütün müştərilərin istifadəsinə təqdim edilib. Abbas İbrahimov bu yeniliyi “bankçılığa yanaşmanın dəyişməsi – gələcəyin bankçılığı” kimi dəyərləndirir. Onun sözlərinə görə, süni intellekt sayəsində bank ilk dəfə müştərinin həyatına onun danışıq dili ilə daxil olur, milyonlarla müştəri ilə eyni anda, amma hər biri ilə fərdi şəkildə ünsiyyət qurmaq mümkün olur. Qısa müddətdə yüz minlərlə müştərinin AI-khan və AI-nurla sadəcə danışaraq maliyyə əməliyyatlarını həyata keçirməsi göstərir ki, müştərilər sadəcə rəqəmsal interfeys yox, ünsiyyət gözləyirlər. Bank rəhbəri vurğulayır ki, hədəf süni intellekti ayrıca bir funksiyaya yox, müştəri ilə bütün münasibətlərin ayrılmaz hissəsinə çevirməkdir: “Bank təkcə maliyyə xidmətləri göstərən qurum olmaqdan çıxıb, müştərinin gündəlik həyatında real dəyər yaradan, onunla daim ünsiyyətdə olan həyat tərzi tərəfdaşına çevrilir.”