Azərbaycan Respublikası Dövlət Neft Fondu (ARDNF) Çin-ASEAN Birgə İnvestisiya Şurasının (CAJIC) təsisçi üzvlərindən biri olub.
GDP xəbər verir ki,şuranın yaradılması Çinin Syamen şəhərində keçirilən 26-cı Çin Beynəlxalq İnvestisiya və Ticarət Sərgisi (CIFIT) çərçivəsində elan edilib.
CAJIC ARDNF, Çin İnvestisiya Korporasiyası (CIC), Tayland Hökumətinin Pensiya Fondu, Malayziyanın suveren sərvət fondu “Khazanah Nasional Berhad”, Malayziyanın pensiya fondu “Kumpulan Wang Persaraan (Diperbadankan)” və İndoneziya İnvestisiya Qurumu (INA) tərəfindən təsis olunub.
CIC-in təşəbbüsü ilə yaradılan Şuranın Katibliyinin fəaliyyətini “CGS International Securities Pte. Ltd.” şirkəti həyata keçirəcək. Platformanın əsas məqsədi suveren sərvət fondlarını və digər aparıcı institusional investorları bir araya gətirməklə Çin və Cənub-Şərqi Asiya arasında uzunmüddətli investisiya əlaqələrinin gücləndirilməsi, təcrübə mübadiləsi və yeni əməkdaşlıq imkanlarının araşdırılmasıdır.
CAJIC-in fəaliyyəti institusional tərəfdaşlıqların inkişafı, bilik və təcrübə mübadiləsi, eləcə də kapital və investisiya əməkdaşlığı olmaqla üç əsas istiqaməti əhatə edəcək. Bu çərçivədə investisiya forumlarının, dəyirmi masaların və rəhbər səviyyəli proqramların keçirilməsi, tədqiqatların aparılması, həmçinin qarşılıqlı maraq doğuran sahələrdə investisiya təşəbbüslərinin reallaşdırılması nəzərdə tutulur.
Şuranın yaradılması ARDNF-nin Asiya regionunda son illərdə genişləndirdiyi investisiya əməkdaşlığının növbəti mərhələsi hesab olunur. Fond Çin bazarında on ildən artıq investisiya təcrübəsinə malikdir və son dövrdə ölkənin aparıcı maliyyə institutları ilə əlaqələrini genişləndirib.
2025-ci ilin aprelində ARDNF və CIC arasında imzalanan Anlaşma Memorandumu tərəflər arasında investisiya əməkdaşlığının, bilik və təcrübə mübadiləsinin, eləcə də qarşılıqlı faydalı təşəbbüslərin inkişaf etdirilməsi üçün strateji çərçivə yaradıb.
Əməkdaşlıq 2026-cı ilin aprelində ARDNF, CIC və INA tərəfindən “Galaxy Orientis” Çin-ASEAN İnvestisiya Proqramının (CAIP) yaradılması ilə yeni mərhələyə keçib. Suveren investorların rəhbərlik etdiyi özəl kapital platforması ilkin mərhələdə təxminən 520 milyon ABŞ dolları vəsait cəlb edib. Proqramın hədəf həcmi 1 milyard ABŞ dollarıdır.
CAIP Çin və Cənub-Şərqi Asiya arasında genişlənən iqtisadi və sənaye əlaqələrindən yaranan uzunmüddətli investisiya imkanlarına yönəlib. Proqram sənaye, səhiyyə, istehlak, biznes xidmətləri və texnologiya da daxil olmaqla bir sıra sahələri əhatə edir.
CAIP və CAJIC ayrıca idarə olunan, lakin bir-birini tamamlayan təşəbbüslərdir. CAJIC institusional əlaqələrin qurulması, bilik mübadiləsi və potensial əməkdaşlıq istiqamətlərinin müəyyənləşdirilməsi üçün daha geniş platforma rolunu oynayır. CAIP isə iştirakçı suveren institutların konkret investisiya imkanlarına birgə kapital yönəltməsinə şərait yaradır.
Bu təşəbbüslərin Azərbaycan üçün də strateji əhəmiyyət daşıdığı bildirilir. Orta Dəhlizin Asiya ilə Avropa arasında bağlantıların gücləndirilməsində rolunun artması Azərbaycanın iki region arasındakı mövqeyini daha da önə çıxarır. ARDNF-nin Asiyanın aparıcı suveren və uzunmüddətli investorları ilə əməkdaşlığının genişlənməsi isə regionla maliyyə və institusional əlaqələrin dərinləşməsinə töhfə verə bilər.
CAJIC-in təsisçi üzvü kimi ARDNF Şuranın fəaliyyətinə qlobal institusional investor kimi təcrübəsi ilə töhfə verməyi, eyni zamanda regionun aparıcı investisiya institutları ilə tərəfdaşlıqlarını genişləndirməyi planlaşdırır. Fondun Şurada iştirakı uzunmüddətli portfel şaxələndirilməsi, strateji tərəfdaşlıqların qurulması və yeni investisiya imkanlarına çıxışın artırılması yanaşmasının tərkib hissəsi kimi qiymətləndirilir.