Aprelin ortalarından etibarən Azərbaycanda dövlət dəstəkli aqrar sığorta mexanizmi ilə pambıq əkinlərinin sığortalanması mövsümü start götürüb.
Pambıqçılıqla məşğul olan fermerlər və təsərrüfatlar Aqrar Sığorta Fonduna müraciət edərək güzəştli şərtlərlə əkinlərini sığorta edə bilərlər. Sığorta kampaniyası aprel ayında başlayır və mayın sonunadək davam edir.
Sığorta şərtləri və məbləğləri
Dövlət 50% dəstək verdiyindən fermerlər pambıq sahələrini cüzi məbləğlərlə sığorta edə bilirlər. Ölkənin əksər ərazilərində 1000 manatlıq pambıq məhsulunun sığortası cəmi 7-10 manat arasında dəyişir.
Sığorta aşağıdakı riskləri əhatə edir:
· dolu
· sel və subasma
· leysan yağışları
· üçüncü şəxslərin hərəkətləri
Sığorta ödənişləri üzrə statistika
Aqrar Sığorta Fondu indiyədək minlərlə fermerə 2,2 milyon manatdan çox ödəniş edib:
· 2023-cü ildə – 686 hektar sahəyə dəymiş zərər üzrə 386 min manat
· 2024-cü ildə – 4 min hektar ərazi üzrə 880 min manat
· 2025-ci ildə – 2064 hektar pambıq sahəsi üzrə 958 min manat
Azərbaycanın 20-yə yaxın rayonunda 110 min hektara yaxın ərazidə pambıq becərilir. Əsas pambıqçılıq rayonları: Saatlı (12,6 min ha), Ağcabədi (11,8 min ha), Sabirabad (11,1 min ha), Salyan (9,7 min ha), Beyləqan (8,9 min ha), Bərdə (8,5 min ha) və digərləri.
Hazırda ölkədə 15 minə yaxın fermer pambıq əkini ilə məşğuldur. Pambıq strateji kənd təsərrüfatı bitkisi olmaqla yanaşı, əsas qeyri-neft ixrac məhsullarından biridir.
Ətraflı məlumat üçün Aqrar Sığorta Fondunun rəsmi saytına (asf.gov.az) və 1651 Çağrı Mərkəzinə müraciət edilə bilər.