Azərbaycan Hava Yolları (AZAL) bu il artıq dördüncü hava gəmisini – “Airbus A320neo” təyyarəsini istismara qəbul edib. Bununla da aviaşirkətin mövcud donanmasındakı təyyarələrin ümumi sayı 30-a çatıb.
GDP xəbər verir ki, yeni təyyarə, AZAL-ın donanmanı müasir nəsil təyyarələrlə yeniləmə proqramı çərçivəsində əlavə olunub. Bu, əməliyyat çevikliyini artırmaq, artan sərnişin tələbatını ödəmək və marşrut şəbəkəsini genişləndirmək məqsədlərinə xidmət edir.
“Airbus A320neo” “Airspace” kabini, geniş əl yükü yerləri, yüksəksürətli Wi-Fi, biznes sinfində fərdi monitorlar və qənaətcil yeni mühərriklərlə təchiz edilib. Bu, həm sərnişin rahatlığını yüksəldir, həm də yanacaq sərfiyyatı və karbon emissiyasını əhəmiyyətli dərəcədə azaldır.
Qeyd edək ki, ilin birinci yarısında AZAL iki “A320neo” və bir “A321neo” təyyarəsini donanmasına qatmışdı. 2026-cı ilin sonuna kimi rekord sayda yeni təyyarənin parka daxil olması planlaşdırılır. Uzunmüddətli strategiyaya əsasən, 2032-ci ilədək donanmanın 50 təyyarəyə çatdırılması hədəflənir.
https://youtu.be/n70XGcJJhxg