Avropa İttifaqının 2026-cı ildən tətbiq etməyə başladığı Transsərhəd Karbon Tənzimləmə Mexanizmi (CBAM) alüminium sənayesində yeni mərhələ formalaşdırır.
GDP xəbər verir ki, yeni qaydalar fonunda Azərbaycanın əsas istehsalçılarından olan “Azəralüminium” MMC-nin fəaliyyəti xüsusilə diqqət mərkəzinə çıxır.
Məlumata görə, alüminium CBAM çərçivəsində yüksək riskli məhsul qrupuna daxildir. Buna səbəb istehsal prosesinin yüksək enerji sərfiyyatı və böyük həcmdə karbon emissiyası ilə müşayiət olunmasıdır.
Hesablamalara əsasən, 1 ton alüminium istehsalı zamanı 13-15 tonadək CO₂ emissiyası yarana bilər.
2026-cı ildən etibarən Aİ-yə alüminium ixrac edən şirkətlər karbon sertifikatları almağa və məhsulların emissiya göstəricilərini rəsmi qaydada hesabatlaşdırmağa başlayıblar. Bu isə aşağı karbon emissiyalı istehsal modelinə malik müəssisələrin rəqabət imkanlarını daha da artırır.
Bu baxımdan, “Azəralüminium” MMC üçün mühüm üstünlük formalaşır. Belə ki, müəssisənin hidroelektrik enerjidən istifadəsi nəticəsində 1 ton alüminium istehsalına düşən CO₂ emissiyası 2 tondan aşağıdır. Bu göstərici şirkətin Avropa bazarında daha əlverişli mövqedə çıxış etməsinə imkan yarada bilər.
Ekspert qiymətləndirmələrinə görə, CBAM tələbləri çərçivəsində karbon “ayaq izi”nin azaldılması üçün yaşıl enerji mənbələrindən istifadənin genişləndirilməsi Azərbaycanın alüminium məhsullarının beynəlxalq bazarlarda rəqabət qabiliyyətini artıracaq. Bu prosesdə “Azəralüminium” MMC-nin mövcud istehsal göstəriciləri və aşağı emissiya səviyyəsi strateji üstünlük kimi dəyərləndirilir.
Hazırda “Azəralüminium” MMC sertifikatlaşdırma prosesinin təşkili, həmçinin CBAM tələblərinin öyrənilməsi istiqamətində ixtisaslaşmış şirkətlər və Dünya Bankı kimi beynəlxalq təşkilatlarla əməkdaşlıq edir.
Mütəxəssislər hesab edirlər ki, bərpa olunan enerji layihələrinin inkişafı və aşağı karbonlu istehsal modelinin genişlənməsi fonunda “Azəralüminium” MMC Avropa bazarında mövqeyini daha da gücləndirə bilər.