ABŞ dollarının beynəlxalq hesablamalardakı rolu yenidən güclənir. Bloomberg agentliyinin məlumatına görə, dolların SWIFT ödəniş sistemindəki payı 2025-ci ilin noyabr ayından etibarən davamlı artım tendensiyası göstərir. Yanvar ayında qeydə alınan müvəqqəti azalma yalnız texniki xarakter daşıyıb və Yaxın Şərqdəki gərginliyin kəskinləşməsi fonunda artım yenidən sürətlənib.
GDP Bloomberg-ə istinadən xəbər verir ki, dolların SWIFT vasitəsilə aparılan əməliyyatlardakı payı son aylarda əhəmiyyətli şəkildə yüksəlib. Agentlik bu artımı qlobal ticarət və maliyyə axınlarında “təhlükəsizlik və likvidlik” axtarışının güclənməsi ilə əlaqələndirir. Xüsusilə ABŞ-ın İrana qarşı hərbi addımlarının intensivləşdiyi dövrdə bir çox ölkənin və korporasiyanın dollar likvidliyinə təlabatı artıb.
Son illərdə bir sıra ölkələr və maliyyə qurumları dollar asılılığını azaltmaq, regional ödəniş sistemlərini gücləndirmək və alternativ hesablaşma mexanizmlərini inkişaf etdirmək barədə addımlar atıb. Lakin Bloomberg-un qiymətləndirməsinə görə, hazırkı geosiyasi gərginlik bu prosesləri yavaşlatır və dolların qlobal dominantlığını daha da möhkəmləndirir.
Analitiklərin ümumi qənaətinə görə, barıt iyi davam etdikcə dolların əsas benefisiar olacağı proqnozları qüvvədə qalır. “Dedollarlaşma” ilə bağlı genişmiqyaslı proqnozlar növbəti dəfə reallıq testindən keçərkən, qlobal maliyyə axınları yenidən ABŞ dollarının üstünlüyünü təsdiqləyir.