Azərbaycan Nazirlər Kabinetinin təsdiq etdiyi qaydalara əsasən, 2027-ci il və sonrakı üç il üzrə dövlət büdcəsinin gəlirləri proqnozlaşdırılıb.
GDP xəbər verir ki, proqnoz makroiqtisadi göstəricilər, neft qiymətləri və qeyri-neft sektorunun inkişaf perspektivləri nəzərə alınmaqla hazırlanıb.
Hesablamalara görə, 2027-ci ildə icmal büdcə gəlirlərinin 48 milyard 63,6 milyon manat olacağı gözlənilir. Bu, 2026-cı ilin təsdiq olunmuş göstəricisi ilə müqayisədə 3 milyard 94,2 milyon manat və ya 6,9 faiz çoxdur.
Ortamüddətli dövrün sonuna, yəni 2030-cu ilə gəldikdə isə büdcə gəlirlərinin 53 milyard 799,9 milyon manata çatacağı proqnozlaşdırılır. Bu da 2027-ci illə müqayisədə 8 milyard 830,5 milyon manat və ya 19,6 faiz çoxdur.
Proqnozda xam neftin qiyməti 2027-2030-cu illər üzrə 65 ABŞ dolları/barel səviyyəsində götürülüb. Bununla yanaşı, neft-qaz sektorunda proqnozlaşdırılan hasilat həcmləri və Dövlət Neft Fondunun aktivlərinin gəlirlilik faizi də nəzərə alınıb.
Maraqlıdır ki, ümumi büdcə gəlirlərində artım gözlənilsə də, dövlət büdcəsinin neft-qaz gəlirləri 2027-ci illə müqayisədə 17 faiz azalaraq 2030-cu ildə 12,7 milyard manata enəcək.
Qeyd edək ki, proqnoz Nazirlər Kabinetinin 10 yanvar 2020-ci il tarixli 4 nömrəli Qərarı ilə təsdiq edilmiş “Dövlət büdcəsinin gəlirlərinin, o cümlədən dövlət büdcəsinin qeyri-neft gəlirlərinin və dövlət büdcəsinin neft gəlirlərinin proqnozlaşdırılması” Qaydasına uyğun olaraq hazırlanıb.