Ağdam, Füzuli və Xocalı rayonlarında bərpa və yenidənqurma işlərinin davam etdirilməsi, eləcə də artıq salınmış kəndlərin ikinci mərhələlərinin tikintisi əsas prioritetlər sırasındadır.
GDP xəbər verir ki,bunu Azərbaycan Prezidentinin xüsusi nümayəndəsi Emin Hüseynov jurnalistlərə açıqlamasında bildirib.
Onun sözlərinə görə, qarşıdakı dövrdə hər üç rayonda həm şəhərlərdə, həm də yeni kəndlərdə bərpa prosesi davam edəcək.
“Eyni zamanda, mövcud tikilmiş kəndlərin ikinci mərhələləri əsas prioritetlərimizdən biridir. Birinci mərhələlər tikilib, ikinci mərhələləri də davam etdirməliyik. Çünki artıq köçmüş əhali və bundan sonra köçmək istəyən vətəndaşlar arasında buna böyük istək var. Vətəndaş qəbullarımız da bunu göstərir”, – Emin Hüseynov qeyd edib.
Xüsusi nümayəndə işğaldan azad edilmiş ərazilərdə sənaye və sahibkarlığın inkişafı istiqamətində fəaliyyətin də davam etdiriləcəyini vurğulayıb. O bildirib ki, Ağdam Sənaye Parkında hazırda 30-dan çox rezident fəaliyyət göstərir, onlardan 9-u artıq istehsala başlayıb.
Emin Hüseynovun sözlərinə görə, Qarabağ və Şərqi Zəngəzurda tətbiq olunan xüsusi iqtisadi rejim, mövcud güzəştlər və dövlət təşviqi mexanizmləri bu ərazilərdə fəaliyyət göstərmək istəyən sahibkar və şirkətlərin marağını artırır.
Xankəndi, Xocalı, Ağdərə və Xocavənddə, xüsusilə kənd təsərrüfatı və emal sahələrində fəaliyyət göstərmək istəyən sahibkarların sayının artdığını deyən xüsusi nümayəndə hesab edir ki, əhalinin bölgəyə qayıdışı biznes üçün də yeni imkanlar yaradır.
“Əhali ora köçdükcə həm işçi qüvvəsi, həm müştəri bazası, həm də infrastruktur formalaşır. Bunlar ekosistemin bütün vacib elementləridir. Əminəm ki, emal sənayesi müəssisələri də orada olacaq”, – o bildirib.
Xarici şirkətlər Qarabağdakı layihələrlə maraqlanır
Emin Hüseynov xarici investorların bölgəyə marağı barədə də danışıb. Onun sözlərinə görə, demək olar ki, hər ay səfirliklər və şirkətlər vasitəsilə xarici tərəfdaşlarla təmaslar keçirilir, səfərlər və təqdimatlar təşkil olunur.
O qeyd edib ki, hazırda bir sıra xarici şirkətlər bölgədə birgə müəssisələr və ya təchizatçı qismində fəaliyyət göstərir. Bununla belə, sırf 100 faiz xarici kapitalla yaradılmış müəssisələrin hələlik olmadığını bildirib.
Xüsusi nümayəndə Slovakiya, Türkiyə, Yaponiya və Çin şirkətlərinin bölgəyə maraq göstərdiyini də açıqlayıb. O xatırladıb ki, Ağdam rayonunun Baş Qərvənd kəndinin tikintisi Slovakiya mütəxəssislərinin iştirakı ilə həyata keçirilir və Slovakiya şirkətləri bölgədəki imkanlara böyük maraq göstərirlər.
Türkiyə şirkətlərinin də davamlı maraq nümayiş etdirdiyini bildirən Emin Hüseynov Yaponiya şirkətlərinin də bölgədəki imkanlarla yaxından maraqlandığını deyib.
Onun sözlərinə görə, son dövrlərdə Çin şirkətlərindən də konkret təkliflər daxil olub. Bu təkliflər əsasən tikinti materiallarının satışı və emalı, yerli istehsalın qurulması və prefabrik materialların hazırlanması ilə bağlıdır. Məqsəd tikinti prosesinin sürətinin və keyfiyyətinin artırılmasına töhfə verməkdir.
Emin Hüseynov bildirib ki, daxil olan təkliflər qiymətləndirilir, şirkətlərin biznes planları, iqtisadi və maliyyə dayanıqlığı nəzərdən keçirilir.
“Bir biznesin qurulması üçün bir çox amillər nəzərə alınmalıdır. Bu, bir prosesdir və bəzən bir qədər uzun çəkir”, – xüsusi nümayəndə əlavə edib.
Müxtəlif: Aynur Qəniyeva