Britaniyanın aparıcı bankları HSBC və Standard Chartered növbəti qalmaqalın mərkəzinə düşüb.
GDP xəbər verir ki, The Telegraph nəşrinin yaydığı məlumata görə, hər iki bank İran üçün milyonlarla dollar vəsaitin köçürülməsi sxemində hallanır.
Məlumatda qeyd olunur ki, söhbət beynəlxalq maliyyə məhdudiyyətlərindən yan keçməklə həyata keçirilən iri həcmli əməliyyatlardan gedir.
Xəbər Britaniya bank sektorunda əvvəlki qalmaqalları da yenidən gündəmə gətirib. Belə ki, HSBC daha əvvəl Meksika narkokarteli ilə bağlı pulların yuyulması işi üzrə də ittihamlarla üzləşmişdi. Həmin dövrdə kartelin bankın kassaları üçün xüsusi pul paketləri sifariş etdiyi barədə məlumatlar yayılmışdı. Buna baxmayaraq, həmin iş üzrə bank rəhbərliyindən heç kim həbs olunmamışdı.
Yeni iddialar beynəlxalq bank sistemində nəzarət mexanizmlərinin effektivliyi və iri maliyyə qurumlarının məsuliyyəti ilə bağlı sualları yenidən aktuallaşdırır. Hələlik HSBC və Standard Chartered tərəfindən məsələ ilə bağlı rəsmi açıqlama verilməyib.