Azərbaycan Mərkəzi Bankı (AMB) “Naxçıvanbank” ASC-nin əmanətçiləri və digər depozit hesabı sahibləri üçün hesab qalıqlarının geri qaytarılması prosesini daha əlçatan edir.
GDP xəbər verir ki,yeni tətbiq olunan sistem vətəndaşlara onlayn qaydada müraciət etmək imkanı verir.
Artıq fiziki şəxslər AMB-nin “Elektron Xidmətlər Portalı”nın “Elektron müraciətlər sistemi” vasitəsilə qalıq vəsaitlərinin öz bank hesablarına köçürülməsi üçün müraciət edə bilərlər. Müraciətə şəxsiyyət vəsiqəsinin surəti, bank hesab rekvizitləri, vəkil tərəfindən edildikdə etibarnamə və nümayəndənin sənədinin surəti əlavə edilməlidir.
Ənənəvi qaydada müraciət etmək istəyənlər isə AMB-nin Naxçıvan Muxtar Respublikası İdarəsinə yaxud 2 və 5 saylı “ASAN xidmət” mərkəzlərində fəaliyyət göstərən vətəndaş qəbulu bölmələrinə üz tuta bilərlər. Fiziki şəxslərə vəsait nağd qaydada, hüquqi şəxslərə və fərdi sahibkarlara isə köçürmə yolu ilə ödənilir.
AMB qeyd edir ki, bu dəyişikliklər maliyyə xidmətləri istehlakçılarının hüquqlarının qorunması və xidmətlərin əlçatanlığının artırılması istiqamətində atılan növbəti addımdır.