Maliyyə Nazirliyində keçirilən növbəti Kollegiya iclasında Dövlət Xəzinədarlıq Agentliyi və Dövlət Maliyyə Nəzarəti Xidmətinin görülən işləri, qarşıdakı vəzifələr və cari məsələlər müzakirə edilib.
İclasda maliyyə naziri Sahil Babayev bildirib ki, Prezident İlham Əliyevin rəhbərliyi ilə aparılan siyasət nəticəsində makroiqtisadi sabitlik gücləndirilib, maliyyə dayanıqlığı təmin edilib. 2026-cı ilin yanvar-mart aylarında dövlət büdcəsinin icrasında müsbət dinamika davam edib: gəlirlər 9,6 milyard manat (proqnoza nisbətən 5% artıq), xərclər isə 7,8 milyard manatdan çox olub.
Xəzinədarlıq Agentliyinin hesabatında qeyd olunub ki, sənədlərin icra müddəti ötən illə müqayisədə 2 dəfəyədək sürətlənib, real vaxt rejimində məlumatlara çıxış imkanı verən “Maliyyə Hesabatlılıq Portalı” yaradılıb. Həmçinin 75 adda xidmət əməliyyatı müəyyən edilib, 12 xidmət pasportu və 1 təlimat hazırlanıb.
Dövlət Maliyyə Nəzarəti Xidmətinin fəaliyyətinə dair bildirilib ki, 2025-ci il və 2026-cı ilin birinci rübündə 157 nəzarət obyektində keçirilən yoxlamalar zamanı nöqsanlar aradan qaldırılıb, maliyyə pozuntuları bərpa olunub, qanun pozmuş vəzifəli şəxslər barəsində inzibati və intizam tədbirləri görülüb.
Nazir Sahil Babayev elektron sistemlərin təkmilləşdirilməsi, xəzinə əməliyyatlarında vahid standartların tətbiqi, risk əsaslı yanaşmanın genişləndirilməsi və ilkin maliyyə nəzarəti mexanizmlərinin gücləndirilməsi ilə bağlı tapşırıqlar verib. İclasda həmçinin tapşırıqların icra vəziyyətinə dair təqdimat nümayiş etdirilib və qərarlar qəbul edilib.
