Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi (AİBNDA) dövlət satınalmalarının rəqəmsallaşdırılması və bu sahədə rəqabətin genişləndirilməsi istiqamətində tədbirləri davam etdirir.
Bu barədə AİBNDA sədrinin müavini Mirzə Mirzəyev media nümayəndələri üçün keçirilən “Dövlət satınalmaları: proses, iştirakçılar və nəzarət mexanizmləri” mövzusunda təlimdə bildirib.
Onun sözlərinə görə, dövlət satınalmaları dövlət maliyyə resurslarının səmərəli idarə edilməsində mühüm rol oynamaqla yanaşı, rəqabət mühitinin inkişafına, sahibkarların dövlət sifarişlərinə çıxış imkanlarının genişləndirilməsinə və büdcə vəsaitlərinin məqsədyönlü istifadəsinə təsir göstərir.
Mirzə Mirzəyev bildirib ki, son illərdə dövlət satınalmaları sisteminin daha müasir, rəqəmsal və rəqabətə əsaslanan model üzrə inkişaf etdirilməsi istiqamətində mühüm addımlar atılıb. Nəticədə 2025-ci ildə dövlət satınalmalarının ümumi həcmi 2020-ci illə müqayisədə 1,6 dəfə artıb.
Eyni dövrdə elektron satınalmaların sayında və məbləğində daha yüksək artım qeydə alınıb. Belə ki, 2025-ci ildə 2020-ci illə müqayisədə elektron satınalmaların sayı 4,3 dəfə, məbləği isə 5,3 dəfə artıb. Elektron satınalmalar nəticəsində dövlət büdcəsinə qənaət edilmiş vəsaitin ehtimal olunan qiymətdə xüsusi çəkisi 17,9% təşkil edib.
Cari ilin ilk yarısında da elektron satınalmalarda yüksək aktivlik müşahidə olunub. 2026-cı ilin yanvar–iyun aylarında 3 500-ə yaxın elektron satınalma keçirilib və onların ümumi məbləği 1,7 milyard manat olub. Açılışı baş tutmuş müsabiqələr üzrə orta iştirakçı sayı 3,5 təşkil edib.
İlin ilk yarısında elektron satınalmalar nəticəsində dövlət büdcəsinə 294,3 milyon manat qənaət edilib. Qənaət edilmiş məbləğin ehtimal olunan qiymətdə xüsusi çəkisi 14,7% olub.
Sədr müavini dövlət satınalmalarının vahid internet portalının funksional imkanlarının genişləndirilməsi və digər dövlət informasiya sistemləri ilə inteqrasiyası istiqamətində də işlərin aparıldığını qeyd edib. Ötən dövrdə portalın Mərkəzi Bank, İqtisadiyyat Nazirliyi yanında Dövlət Vergi Xidməti, Ədliyyə Nazirliyi və Maliyyə Nazirliyinin informasiya sistemləri ilə inteqrasiyası həyata keçirilib.
Mirzə Mirzəyev biznes subyektlərini dövlət satınalmalarında daha fəal iştirak etməyə çağırıb. O bildirib ki, iştirakçı sayının artması sağlam rəqabətin güclənməsinə, sahibkarların dövlət sifarişlərinə çıxış imkanlarının genişlənməsinə və dövlət satınalmaları sahəsində müsbət dinamikanın davamlı olmasına şərait yaradır.
AİBNDA rəsmisi dövlət satınalmaları sahəsində həyata keçirilən dəyişikliklərin və əldə olunan nəticələrin ictimaiyyətə düzgün çatdırılmasında medianın rolunu da xüsusi vurğulayıb.