Azərbaycan Respublikası Dövlət Neft Fondu (ARDNF), Çin İnvestisiya Korporasiyası (ÇİK) və İndoneziya İnvestisiya Qurumu birgə “Galaxy Orientis” Çin–ASEAN İnvestisiya Platformasını (CAIP) təsis edib. Sözügedən platforma üzrə ilkin mərhələdə təxminən 520 milyon ABŞ dolları həcmində vəsait cəlb olunub, ümumi hədəf həcmi isə 1 milyard dollar olaraq müəyyən edilib.
GDP xəbər verir ki, 13 aprel tarixində Pekində keçirilən imzalanma mərasimində tərəflər ÇİK-in icraçı vitse-prezidenti Jan Şaoçinq, İndoneziya İnvestisiya Qurumunun baş investisiya direktoru Kristofer Qanis, ARDNF-nin İnvestisiya departamentinin direktoru Fərhad Zeynalov, həmçinin “China Galaxy Securities” şirkətinin nümayəndəsi Vu Penq təmsil edib.
Platforma Çin və ASEAN regionu arasında kapital axınlarının təşviqi və sənaye əməkdaşlığının gücləndirilməsi məqsədilə üç suveren fondun birgə idarəetmə mexanizmi əsasında fəaliyyət göstərəcək. Çin-ASEAN ticarət əlaqələrinin dərinləşməsi və Cənub-Şərqi Asiyada təchizat zəncirlərinin yenidən formalaşması fonunda Proqram sənaye, səhiyyə, istehlak, biznes xidmətləri və texnologiya sahələrində yüksək keyfiyyətli investisiya imkanlarını dəyərləndirməyi hədəfləyir.
Proqramın baş tərəfdaşı qismində çıxış edən “China Galaxy Securities” şirkətinin beynəlxalq törəmə qurumu – “CGS International Securities Pte. Ltd.” region üzrə geniş təcrübə, əməliyyat infrastrukturu və Cənub-Şərqi Asiyada mövcud şəbəkələri ilə platformanın fəaliyyətinə dəstək verəcək.
Çin İnvestisiya Korporasiyasının İdarə Heyətinin sədri və baş icraçı direktoru Jan Çinqson bildirib: “Hesab edirik ki, ASEAN bazarına yönəlmiş yüksək keyfiyyətli şirkətlərə investisiya yatırmaqla Fond yalnız dayanıqlı maliyyə gəlirləri əldə etməyəcək, eyni zamanda regionda iqtisadi inkişafın təşviqinə töhfə verəcəkdir.”
ARDNF-nin İcraçı direktoru İsrafil Məmmədov isə qeyd edib: “Bu platforma suveren fondlar arasında əməkdaşlığın genişləndirilməsi və dünyanın ən dinamik iqtisadi istiqamətlərində yeni imkanlara çıxışın təmin olunması baxımından strategiyamızın mühüm mərhələsidir. Bu əməkdaşlıq ARDNF-nin investisiya portfelinin daha da şaxələndirilməsinə töhfə verəcəkdir.”
Qeyd edək ki, 1999-cu ildə təsis edilmiş ARDNF hazırda məcmu aktivlərinin həcmi 70 milyard ABŞ dollarından çox olan suveren sərvət fondudur. Çin İnvestisiya Korporasiyasının ümumi aktivlərinin həcmi isə 2024-cü ilin sonuna 1,57 trilyon dollar təşkil edib.
