Azərbaycanın iri özəl banklarından biri olan “Unibank” kadr dəyişikliyi olub.Rusiyalı tanınmış menecer Dmitrii Uxanov 2026-cı ilin aprel ayından etibarən bankda Biznes Effektivlik və Analitika Meneceri vəzifəsinə başlayıb.
Dmitrii Uxanovun peşəkar karyerası 2016-cı ildə satış əməliyyatları ilə başlayıb. O, ilk iş təcrübəsini sığorta sahəsində qazanıb, ardınca satış operatoru və komanda rəhbəri kimi fəaliyyət göstərib. 2020–2021-ci illərdə metodoloq vəzifəsində çalışaraq biznes proseslərinə metodoloji dəstək verib.
Menecerin karyerasında ən uzun və parlaq dövr “Tinkoff” bankı ilə bağlıdır. Burada o, təxminən səkkiz il ərzində biznes proseslərinə dəstək rəhbərliyindən tutmuş, 50-dən çox işçisi olan korporativ dəstək departamentinin rəhbərliyinə qədər yüksəlib. Həmçinin “Tinkoff”da biznes analitikası (BI) üzrə mütəxəssis kimi də çalışıb.
Daha sonra Uxanov “VTB” bankında idarəetmə hesabatı qrupunun rəhbəri vəzifəsini icra edib, 2025-ci ildə isə yenidən “Tinkoff”a qayıdaraq dörd analitikdən ibarət idarəetmə hesabatı komandasına rəhbərlik edib. Bununla yanaşı, o, 2025-ci ilin iyulundan “ImpalaJump” startapının təsisçisidir.
Yeni iş yerində Dmitrii Uxanov biznes analitikası, icra hesabatları və bank analitikasının inkişafı istiqamətlərinə rəhbərlik edəcək.
Qeyd edək ki, “Unibank” 30 ildən artıqdır ki, Azərbaycan bazarında fəaliyyət göstərir və ölkənin aparıcı özəl banklarından biri hesab olunur.