“Bu gün maliyyə sektorunun əsas çağırışları artan xərclər və dələduzluqdur”
“GDP Media” xəbər verir ki, Bakıda keçirilən X Beynəlxalq Maliyyə və Bankçılıq Sammitində Azərbaycan Mərkəzi Bankının (AMB) İdarə Heyətinin üzvü Vüsal Xəlilov maliyyə sektorunun əsas çağırışlarını artan xərclər və dələduzluq kimi qiymətləndirib.
“Xərclər kontekstində həm rəqəmsallaşma ilə bağlı xərcləri, həm də nağdsız ödənişlər sektorundakı xərcləri qeyd edə bilərik. Bu xərcləri daha çox banklar, ödəniş təşkilatları və təsərrüfat subyektləri hiss edirlər. Dələduzluqla bağlı təhdidlər isə hər bir vətəndaşı birbaşa narahat edir”, – deyə o bildirib.
AMB rəsmisi əlavə edib ki, bu çağırışların aradan qaldırılması istiqamətində AMB bazar iştirakçıları ilə birlikdə ciddi addımlar atır: “İlk növbədə, xərclərin optimallaşdırılması məqsədilə beynəlxalq kart təşkilatları ilə intensiv müzakirələr aparılır. Məqsəd həm ekvayer, həm də işyer tərəfdən təsərrüfat subyektləri üçün daha optimallaşdırılmış tarif siyasətinin formalaşdırılmasıdır. Bu istiqamətdə martın 18-də İdarə Heyətinin qərarı ilə interçeync komissiyalarının yuxarı həddi 0,25 faiz bəndi azaldılıb. Qərar bu aydan qüvvəyə minib və təsərrüfat subyektlərinin xərclərinin azalmasına müsbət təsir göstərəcəyi gözlənilir”.