17–22 may 2026-cı il tarixlərində Bakıda keçiriləcək Ümumdünya Şəhərsalma Forumunun On Üçüncü Sessiyasına (WUF13) hazırlıq çərçivəsində ölkə ictimaiyyətinin məlumatlandırılması məqsədilə WUF13 Festivalı təşkil olunacaq. Festivalın açılışı aprelin 28-də Bakıda baş tutacaq.
Tədbirlər ardıcıl olaraq aprelin 29-da Sumqayıtda, aprelin 30-da Qubada, mayın 2-də Lənkəranda, mayın 4-də Qəbələdə, mayın 5-də Şəkidə, mayın 6-da Mingəçevirdə, mayın 8-də Gəncədə keçiriləcək və mayın 10-da Xankəndidə yekunlaşacaq.
Festival proqramı iki hissədən ibarətdir. Günün birinci yarısında tədbirin keçirildiyi şəhərlərin universitetlərində WUF13 ilə bağlı məlumatlandırma sessiyaları, ikinci yarısında isə açıq havada ictimai proqramlar reallaşdırılacaq.
Axşam proqramı çərçivəsində interaktiv fəaliyyətlər, maarifləndirici oyunlar, təqdimatlar və ictimai müzakirələr vasitəsilə dayanıqlı şəhər inkişafı, inklüziv şəhər mühiti, innovativ şəhər həlləri və gələcəyin şəhərləri kimi mövzular geniş auditoriyaya çatdırılacaq. Eyni zamanda, WUF13-ün əsas mövzusu və ideyaları barədə ətraflı məlumat veriləcək.
Bütün tədbirlərdə iştirak sərbəstdir.