Hər bir vətəndaş iş yerindən asılı olmayaraq öz seçimi əsasında istədiyi bankın ödəniş kartından istifadə edərək əmək haqqını ala bilməlidir.
Dövriyyədə 2.8 mln ədəd əmək haqqı kartı var. İlk işə düzəlirik və əmək haqqı kartını B Bankı təmin edir. Mobil telefon almaq üçün kredit götürməliyik, lakin əmək haqqı yüksək deyil. Kredit kartını U Bankı təmin edir. Aylıq xərclərin qarşılanması və yüksək cashback verdiyi üçün K bankından növbəti kredit kartı alırıq. Bir il keçməmiş başqa bir təşkilatda böyük mütəxəssis vəzifəsinə düzəlirik və yeni əmək haqqı kartı X Bankı tərəfindən təmin edilir. Növbəti il yeni iş təklifi əsasında dövlət qurumunda işə düzəlirik. Üçüncü əmək haqqı kartın R Bankı təmin edir.
Bu arada ilk iki əmək haqqı kartımız ləğv edilməyib, cüzdanımızda gəzdiririk Müştəri olaraq hər dəfə yeni banka öyrəşməyə çalışırıq, buna məcburuq. Seçdiyimiz və daha üstün hesab etdiyimiz bankda xidmət olunmuruq.
Bu səbəbdən məcbur olub öz əmək haqqımızı “card-to-card” edirik. Bu yanaşma əlbəttə ki banklar üçün əlavə xərclər yaradır, loyal müştəri qazanmaq bir problemə çevrilir.
Müştəri olaraq ödəniş kartına çəkdiyimiz maliyyə xərclərinin əhəmiyyətli hissəsi ölkə xaricinə çıxır. Kağız daşıyıcılardan istifadə isə yüksək səviyyədə qalmaqda davam edir.
İş yerindən asılı olaraq əmək haqq kartının dəyişdirilməsi ənənəsi mütləq dayandırılmalıdır. Hər bir vətəndaş iş yerindən asılı olmayaraq öz seçimi əsasında istədiyi bankın ödəniş kartından istifadə edərək əmək haqqını ala bilməlidir.
Müəllif: Tamerlan Rüstəmov
Azərbaycan Banklar Assosiasiyasının nəzdindəki “Ödəniş sistemləri və rəqəmsal bankçılıq üzrə Ekspert Qrupu”nun sədri