İqtisadiyyat Nazirliyinin Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov COP29 çərçivəsində keçirilən “İqlim Dəyişikliyinə Dayanıqlı Kiçik Orta Bizneslər” adlı tədbirdə çıxış edərkən bildirib ki, kiçik və orta biznes subyektlərinin yaşıl iqtisadiyyata keçidi iqlim dəyişikliyi ilə mübarizədə həlledici əhəmiyyət daşıyır.
Məmmədovun sözlərinə görə, KOB-ların fərdi ekoloji təsiri az olsa da, onların ümumi təsiri iri şirkətlərlə müqayisə oluna bilər. Eyni zamanda, KOB-lar öz kiçik ölçüləri və məhdud resursları səbəbindən iqlim dəyişikliyinin mənfi təsirlərinə qarşı daha həssasdırlar.
KOBIA rəhbəri vurğulayıb ki, iqlim böhranının həlli milyonlarla KOB-un yaşıl iqtisadiyyat tələblərinə uyğunlaşması və xalis sıfır emissiyaya keçidi olmadan mümkün deyil.
Məhz bu məqsədlə qurumun təşəbbüsü ilə KOB-ların yaşıl keçidinin COP prosesi də daxil olmaqla iqlim dəyişikliyi üzrə müzakirələrdə əsas prioritet kimi müəyyən edilməsi üçün kompleks ekosistemin bütün iştirakçılarının səfərbər olunması hədəflənib.