2025-ci ilin yanvar ayında 1778,5 min nəfər olan ümumi işçi sayı avqust ayına qədər tədricən azalaraq 1768,4 min nəfərə çatmışdır.
GDP xəbər verir ki, bu, təxminən 10 min nəfərlik və ya 0,57%-lik bir azalma deməkdir.
Əsas diqqət çəkən dəyişiklik işçilərin sektorlar üzrə paylanmasında baş verib. Dövlət sektorunda işçi sayı əhəmiyyətli dərəcədə azalma tendensiyası göstərir. Yanvar ayında 882,8 min nəfər olan dövlət sektoru işçilərinin sayı avqust ayında 858,1 min nəfərə qədər enmişdir. Bu, təxminən 25 min nəfərlik və ya 2,8 faizlik azalma deməkdir. Əksinə, qeyri-dövlət sektorunda isə daimi artım müşahidə olunub. Eyni dövrdə qeyri-dövlət sektorunda işçi sayı 895,7 min nəfərdən 910,3 min nəfərə qədər yüksəlmişdir ki, bu da 14,6 min nəfərlik və ya 1,63 faizlik artımı əks etdirir.
Əməkhaqqı göstəricilərinə nəzər saldıqda isə daha müsbət bir mənzərə ilə qarşılaşırıq. 2025-ci ilin yanvar ayında orta aylıq nominal əməkhaqqı 1062,9 manat təşkil edərkən, bu göstərici ilin ilk yeddi ayı ərzində davamlı artaraq yanvar-iyul dövrü üçün 1098,1 manat səviyyəsinə çatmışdır. Əməkhaqqı artımının tempinə gəldikdə, yanvar ayında əvvəlki ilin müvafiq dövrünə nisbətən 12,8 faiz olan artım tempi ilin davam etdikcə bir qədər aşağı düşsə də, yenə də yüksək səviyyədə – təxminən 9-10 faiz intervalında qalmaqdadır.
Ümumi yanaşmada 2025-ci ilin ilk səkkiz ayında ölkə əmək bazarında iki əsas trend müşahidə olunur: bir tərəfdən ümumi işçi sayında cüzi azalma, digər tərəfdən isə işçi qüvvəsinin dövlət sektorundan özəl sektora doğru yerdəyişməsi olub.