Azərbaycan Kapital Bazarları Assosiasiyası (AKBA) maliyyə bazarlarında iştirak edən bütün vətəndaşları və investorları diqqətli olmağa çağırır. Son dövrlərdə müşahidələrimiz göstərir ki, müxtəlif qeyri-rəsmi platformalar, etibarsız vasitəçilər və fırıldaqçı mexanizmlər vasitəsilə vəsaitlərin ələ keçirilməsi halları artmaqdadır. Hətta bu fırıldaqçılar təəssüf ki, bizim tanınan media platformalarında da özlərini reklam etdirməyə nail olurlar.
AKBA olaraq vurğulamaq istəyirik ki, maliyyə bazarında hər hansı addım atmadan öncə vəsaitlərin yerləşdiriləcəyi platforma və şirkət barədə ətraflı araşdırma aparmaq, məlumatlı qərar vermək mühüm əhəmiyyət kəsb edir. Vəsaitlərin investisiya olunması və ya müəyyən tərəfə köçürülməsi yalnız tam əminlik yarandıqdan sonra həyata keçirilməlidir. Azərbaycan Respublikasında investisiyalar üzrə vasitəçilik və məsləhət xidmətləri lisenziyalı xidmətlərdir. Lisenziyalı təşkilatların siyahısını Mərkəzi Bankın veb-səhifəsindən əldə edə bilərsiniz.
Assosiasiyamızın üzvləri olan investisiya şirkətləri, qanuni əsaslarla fəaliyyət göstərən peşəkar etibarlı şirkətlərdir. İnvestisiya qərarı qəbul edərkən məhz bu şirkətlərin xidmətlərindən faydalanarkən həm vəsaitlərinizin təhlükəsizliyini təmin etmək, həm də ən optimal qazanc imkanları ilə tanış olursunuz.
AKBA olaraq bütün vətəndaşları məsuliyyətli davranmağa, hər bir maliyyə əməliyyatını diqqətlə qiymətləndirməyə və yalnız peşəkar maliyyə qurumlarına etibar etməyə çağırırıq.