Azərbaycanın aparıcı şirkətlərindən biri olan AZCON Holding-in İdarəetmə Şurasının sədri və Baş İcraçı Direktoru, Fuad Məmmədov, Çinin qabaqcıl investisiya bankı China International Capital Corp-un (CICC) Asiya-Avstraliya regionu üzrə vitse-prezidenti Roza Jamulbek-in rəhbərlik etdiyi nümayəndə heyəti ilə görüş keçirib.
GDP xəbər verir ki.görüşdə Çin dövlət müəssisələri, investisiya fondları və aparıcı sənaye şirkətləri ilə potensial əməkdaşlıq imkanları müzakirə edilib. Tərəflər, xüsusilə hava nəqliyyatı, ictimai nəqliyyat və informasiya-kommunikasiya texnologiyaları (İKT) sahələrində birgə təşəbbüslərin həyata keçirilməsi istiqamətində fikir mübadiləsi aparıblar.
Müzakirələr zamanı Azərbaycanın regional nəqliyyat-logistika mərkəzi kimi potensialı, eləcə də ölkədə davam edən infrastruktur layihələri və rəqəmsal transformasiya prosesləri də qeyd olunub. Çin tərəfi isə öz təcrübəsi, texnoloji imkanları və investisiya resursları ilə bu sahələrdə əməkdaşlığa hazır olduğunu bildirib.
AZCON Holding-in rəhbərliyi qeyd edib ki, bu görüş Çin-Azərbaycan iqtisadi əlaqələrinin diversifikasiyası və dərinləşməsi baxımından mühüm addım sayılır. Gələcəkdə hər iki tərəfin konkret layihələr ətrafında iş qrupları yaradaraq əməkdaşlığı daha əməli səviyyəyə keçirə biləcəyi gözlənilir.
