“AzerGold” QSC 2030-cu ilədək illik dövriyyəsini 1 mlrd. manata çatdırmağı hədəfləyir.
GDP xəbər verir ki, bunu Azərbaycan Respublikasının Prezidenti İlham Əliyevin sədrliyi ilə “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirədə “AzerGold” Qapalı Səhmdar Cəmiyyətinin İdarə Heyətinin sədri Zakir İbrahimov deyib.
Onun sözlərinə görə, bu məqsədlə strateji layihələrin maliyyələşdirilməsində daxili gəlirlərdən və borc vəsaitlərindən, həmçinin özəl investisiyalardan istifadəyə üstünlük veriləcək.
“Əsas məqsədimiz gəlir və məşğulluq göstəricilərinə görə “AzerGold”u Azərbaycanın qeyri-neft sənayesinin ən iri şirkətlərindən birinə çevirməkdir”, – deyə Zakir İbrahimov qeyd edib.
Onun sözlərinə görə, şirkətin qızıl hasilatı, gəlirləri, EBITDA göstəricisi və vergi ödənişləri fəaliyyət dövrü ərzində davamlı artıb.
“Qızılın hasilatı 2017-ci illə müqayisədə 2 dəfədən çox artıb. Gəlirlər 3,5 dəfə yüksəlib. Ümumi gəlirlərin 92%-i ixracdan, 8%-i isə daxili bazarda satışdan formalaşır”, – deyə İdarə Heyətinin sədri bildirib.
O qeyd edib ki, 2019-cu ildən qızıl və gümüş məhsullarının istehsalına başlanılıb və daxili pərakəndə satış əlavə dəyər mənbəyinə çevrilib.
Zakir İbrahimovun sözlərinə görə, şirkətin EBITDA göstəricisi 2017-ci ildəki 46 mln. manatdan 2025-ci ildə 260 mln. manata yüksəlib. Bu, təxminən 6 dəfə artım deməkdir.
“EBITDA marjası orta hesabla 50%-dən yüksək olub. Eyni zamanda, şirkətin vergi ödənişləri 15 dəfə artıb”, – deyə o əlavə edib.