“Azərsun Holdinq”in İdarə Heyətinin üzvü Savaş Uzan “Bakı İqlim Fəaliyyəti Həftəsi”nin (BCAW2025) ikinci günündə etdiyi çıxışında Holdinqin kənd təsərrüfatı və təkrar emal sahəsindəki dayanıqlılıq təşəbbüsləri barədə məlumat verib.
GDP -nin məlumatına görə, çıxışında 25 ildən artıqdır ki, “Azərsun Holdinq” tərəfindən Azərbaycanda kənd təsərrüfatına yararlı torpaqların birləşdirilməşdirilərək istifadəsi istiqamətində addımların atıldığını bildirən Savaş Uzan qeyd edib: “Bu torpaqlarda biz innovativ metodlardan istifadə edərək ən son texnologiyaları tətbiq etmişik. Dron və suvarma sistemləri də daxil olmaqla, digər dayanıqlı təcrübələrdən istifadə etmişik. Bu prosesdə biz tək olmamışıq, fermerlərlə birgə işləmişik və bu sahədə uğurlu nəticələrimiz olub.”
Savaş Uzan xüsusi ilə Holdinqin təkrar emal sahəsindəki layihələrinə diqqəti cəlb edib. O bildirdi ki, “Azərsun” olaraq COP29-dan sonra enerji həllərinə daha çox yönəliblər. Bu çərçivədə həyata keçirilən təkrar emal layihəsi ilə bağlı məlumat verən Uzan bildirib: “Təkrar emal üçün tələb olunan kağızlar, Bakının bütün ərazilərindən toplanılan 50 ton istifadə edilmiş kağızları toplayırıq və təkrar emala cəlb edirik. Bunun nəticəsində “Azərsun Holdinq” təxminən 8 min ton ağacın xilas olunmasına nail olur. Bu isə 3,5 milyon ton karbon emissiyasının azalması deməkdir.”