“Business Insight International Research Group” tərəfindən aparılan “Mobil Tətbiq Dünyası” adlı yeni araşdırma Azərbaycanda onlayn ticarət bazarının dinamikasını və istifadəçi meyilləri açıqlanıb.
GDP xəbər verir ki, 666 nəfərin iştirak etdiyi sorğunun nəticələri bazarın iki əsas oyunçu – Trendyol və Temu ətrafında cəmləşdiyini, lakin istifadə tezliyi, regional paylanma və gender üstünlüyü baxımından əhəmiyyətli fərqlər olduğunu göstərir.
Bazar Liderliyində Sıx Rəqabət
Araşdırmanın əsas nəticələrindən biri onlayn ticarət tətbiqləri arasında liderliyin müəyyən edilməsidir. Nəticələrə görə, Trendyol 74,6% ilə ən çox istifadə edilən platforma kimi ön sırada yer alır. Onu 73% göstərici ilə Temu yaxından təqib edir. Bu iki platforma arasındakı cüzi fərq bazarda rəqabətin intensivliyini əks etdirir. Birmarket 23% ilə üçüncü yerdə qərarlaşır. Dünya nəhəngləri Amazon (2,7%) və eBay (2,6%) isə Azərbaycan bazarında hələ də güclü mövqe qazana bilməyib.
Aktiv İstifadəçilərin Seçimi Fərqlidir
Ümumi istifadədə rəqabət sıx olsa da, aylıq istifadə tezliyində fərqli bir mənzərə özünü göstərir. Sorğu nəticələrinə əsasən, istifadəçiləri ən tez-tez ziyarət etdiyi platforma 46,7% ilə Temu olub. Bu o deməkdir ki, iştirakçıların yarıya yaxını hər ay ən azı bir dəfə Temu-dan istifadə edir. Trendyol aylıq aktiv istifadəçi göstəricisində 41,6% ilə ikinci yerdədir. Birmarket (7,5%), AliExpress (1,2%) və İrşad (0,6%) isə xeyli aralıqla onları izləyir. Cavablar arasında “digər” variantının 2,4% olması bazarda çoxsaylı kiçik oyunçuların fəaliyyət göstərdiyinə işarədir.
Regional Üstünlüklər Nəzəri Cəlb Edir
Bakı və region əhalisinin platforma seçimlərində əhəmiyyətli fərqlər müşahidə olunub. Temu regional bölgələrdə (53,5%) paytaxta nisbətən (40,6%) daha populyardır. Trendyol isə əksinə, Bakıda (45,7%) regiondan (36,9%) daha çox üstünlük verilir. Birmarket hər iki bölgədə təxminən eyni səviyyədə (Bakıda 8,5%, regionda 6,4%) istifadə olunur.
Cinsiyyət faktorunun da seçimdə əhəmiyyətli rol oynadığı müəyyən edilib. Temu platforması kişilər arasında (54,3%) qadınlara nisbətən (42%) daha populyardır. Trendyol isə qadın istifadəçilər (51,9%) arasında kişilərdən (24,8%) xeyli üstünlük təşkil edir. Birmarket isə gender balansında nisbi bərabərlik göstərir.
Ümumilikdə, araşdırma nəticələri göstərir ki, Azərbaycan onlayn ticarət bazarı sürətlə inkişaf edir və istifadəçi üstünlükləri coğrafi mövqe, cinsiyyət və platformaların təklif etdiyi məhsul çeşidindən birbaşa təsirlənir.