Azərbaycan Sement İstehsalçıları Assosiasiyası ilə Türkiyə Sement İstehsalçıları Assosiasiyası (TÜRKÇİMENTO) arasında sənayedə dekarbonizasiya və davamlılıq istiqamətində əməkdaşlığı genişləndirmək məqsədilə Anlaşma Memorandumu imzalanıb.
GDP xəbər verir ki, memorandum, əsasən, bilik və qabaqcıl təcrübələrin mübadiləsini nəzərdə tutur.
Əməkdaşlığın əsas istiqamətləri arasında klinker faktorunun azaldılması, aşağı karbon emissiyalı sement növlərinin istehsalı, alternativ yanacaq və bərpa olunan enerji mənbələrindən istifadə, habelə hidrogen texnologiyaları və karbontutma sahələri var. Tərəflər həmçinin aşağı karbon emissiyası üzrə təlimatların hazırlanması, tənzimləyici standartlar və sahəyə xas dekarbonizasiya prosesləri üzrə işləri əlaqələndirəcək.
Azərbaycan Sement İstehsalçıları Assosiasiyasının sədri Henning Sasse imzalama mərasimində etdiyi açıqlamada, “Biz Türkiyə sement istehsalçılarının dekarbonizasiya istiqamətindəki irəliləyişlərini həvəslə izləyirik. Əməkdaşlığımızın sənayemiz üçün dəyərli imkanlar yaradacağına inanırıq” ifadələrini işlətmişdir.
Bu razılaşma, hər iki ölkənin sement sənayesində ekoloji təsiri azaldan, daha təmiz və davamlı istehsal proseslərinə keçidini sürətləndirmək potensialını daşıyır.
