“AvtomatikaAz” MMC-nin təsis etdiyi “AzTruck” rəqəmsal həlli Azərbaycan Respublikası İqtisadiyyat Nazirliyinin dəstəyi və Kiçik və Orta Biznesin İnkişafı Agentliyinin (KOBİA) təşkilatçılığı ilə təsis edilmiş “DAYAQ” mükafatına layiq görülüb.
GDP xəbər verir ki, layihə 2025-ci il üzrə “İlin uğurlu startapı” nominasiyasında qalib elan edilib.
Mükafatla bağlı fikirlərini bölüşən şirkətin təsisçisi və baş icraçı direktoru Xalid Səmədov bildirib ki, bu nailiyyət onun üçün təkcə mükafat deyil, eyni zamanda böyük məsuliyyət, inam və dövlət tərəfindən əməyin dəyərləndirilməsidir.
Onun sözlərinə görə, əmək fəaliyyətinə 2002-ci ildən başlayan Xalid Səmədov uzun illər ərzində həm yerli, həm də xarici şirkətlərdə, eləcə də ölkə üçün strateji əhəmiyyət daşıyan layihələrdə məsul vəzifələrdə çalışıb. İlk şirkətini 2011-ci ildə təsis etsə də, sahibkarlıq fəaliyyətinə tam şəkildə 2016-cı ildən etibarən başlayıb.
Qeyd edib ki, AvtomatikaAz MMC 2019-cu ildə qeyri-neft sektorunun inkişafına dəstək vermək və bu sahədə yüksək dəyər yaradan məhsullar istehsal etmək məqsədilə yaradılıb. Şirkətin əsas layihəsi olan AzTruck üzərində işlərə 2020-ci ildə başlanılıb, layihə üzrə ilk məlumat bazası isə 2021-ci il 17 sentyabr tarixində formalaşdırılıb.
Dörd illik fəaliyyəti ərzində “AzTruck” həm dövlət, həm də özəl sektor üçün müasir və innovativ rəqəmsal həll kimi möhkəm mövqe qazanıb. Layihə ölkədə yükdaşıma və logistika proseslərinin rəqəmsallaşdırılmasına əhəmiyyətli töhfə verir.
Xalid Səmədov vurğulayıb ki, indiyədək bir çox təqdir və dəstək alsa da, “DAYAQ” mükafatı onun üçün xüsusi əhəmiyyət daşıyır: “Bu mükafat mənim üçün əsl uğurdur. Bu, eyni zamanda etibardır və əməyimizin dövlətimiz tərəfindən dəyərləndirilməsidir”.
O, həmçinin qeyd edib ki, əldə olunan bu qiymətləndirmə “AvtomatikaAz” komandası üçün əlavə məsuliyyət yaradır və şirkət bundan sonra da “Rəqəmsal İqtisadiyyat” və ölkə sənayesinin rəqəmsallaşdırılması istiqamətində yeni rəqəmsal alətlərin hazırlanmasını davam etdirəcək.
Xalid Səmədov əməyin yüksək qiymətləndirilməsinə görə Azərbaycan Respublikası İqtisadiyyat Nazirliyi, Kiçik və Orta Biznesin İnkişafı Agentliyi və layihəyə dəstək göstərən bütün tərəflərə “AvtomatikaAz” ailəsi adından təşəkkürünü bildirib.
Qeyd:
2019-cu ildə təsis edilən “AvtomatikaAz” MMC qeyri-neft sektorunun inkişafına yönəlmiş yüksək texnologiyalı və innovativ həllər təqdim edən yerli şirkətdir. Şirkətin əsas fəaliyyət istiqamətləri sənaye sahələrinin rəqəmsallaşdırılması və rəqəmsal iqtisadiyyat üçün proqram təminatlarının hazırlanmasıdır.