Ümumdünya Şəhərsalma Forumunun 13-cü sessiyasına (WUF13) hazırlıq çərçivəsində Ekologiya və Təbii Sərvətlər Nazirliyinin Dövlət Mineral Xammal Ehtiyatlarından İstifadə Agentliyində “Dağ-mədən işlərinin şəhərsalma həllərində yeri və rolu” mövzusunda dəyirmi masa keçirilib. Tədbirdə “Norm” ASC-nin Baş icraçı direktoru Henning Sasse təqdimatla çıxış edib.
Sement istehsalçılarının dayanıqlı şəhərlərin inşasında rolundan bəhs edən Henning Sasse, istehsal zamanı xammal istifadəsinə məsuliyyətli yanaşmanın əhəmiyyətindən danışıb. O qeyd edib ki, bu gün Norm şirkətinin istehsal zamanı istifadə etdiyi xammalın təxminən 80%-i ikinci dərəcəli xammaldır. Xüsusilə, daş istehsalı fəaliyyətindən əmələ gələn tullantı əhəngdaşı sement istehsalında mühüm xammal kimi istifadə olunur.
Henning Sasse vurğulayıb ki, ikinci dərəcəli xammalın uzunmüddətli təmin edilməsi sənayenin dayanıqlı inkişafı üçün vacibdir. Bu kontekstdə, Norm Sement zavodunun əhəngdaşı tullantılarına uzunmüddətli əlçatanlığının olmasının, ən yaxşı halda, 50 ilə qədər müddətdə ehtiyat və təchizatın mövcudluğunun əhəmiyyətini qeyd edib. O, bildirib ki, dayanıqlı şəhərsalmanın əsas şərtlərindən biri istehsal proseslərinin dairəvi iqtisadiyyatı dəstəkləməsini təmin etməkdir.
Bundan əlavə, o, sement sənayesində alternativ yanacaqların istifadəsinin artırılmasının vacibliyindən danışıb. Bu yanacaqların hazırda istehsal zamanı istifadə olunan təbii qazı qismən əvəz edə biləcəyindən, bunun da Azərbaycanın həmin qaz ehtiyatlarını ölkə daxilində, yaxud ixrac və digər məqsədlər üçün istifadə etməsinə imkan verəcəyindən bəhs edib. Bu baxımdan, Norm və bütövlükdə sement sənayesinin alternativ yanacaqlardan istifadəsinin sement istehsalçılarına fayda verməklə yanaşı, Azərbaycan iqtisadiyyatına töhfə verəcəyini bildirib.
O, əlavə edib ki, sement sektorundakı innovasiyalar və əldə edilən irəliləyişlər bu yanaşmanın tətbiqini genişləndirir: “Norm məhsulları dayanıqlı inkişafı dəstəkləyir. Beynəlxalq təcrübəyə uyğun olaraq biz CO2 emissiyaları aşağı olan sement və beton məhsullarını bazara təqdim etməyə artıq başlamışıq. Məhsullarla yanaşı, biz inşaat tərəfində də müəyyən işlər görürük, memarlarla əməkdaşlıq etməklə və beynəlxalq standartları qəbul etməklə, şəhərlərin dayanıqlı inşası üçün addımlar atırıq.”
Henning Sasse, çıxışının sonunda, qoyulan hədəflərə çatmaq üçün digər lazımi amilləri, eləcə də qanunvericilik, siyasət və standartlara olan ehtiyacı da vurğulayıb.
“Norm” ASC 10-dan çox ölkədə enerji, telekommunikasiya, yüksək texnologiyalar və tikinti sahələrində fəaliyyət göstərən beynəlxalq şirkətlər qrupu olan NEQSOL Holding-in tərkibinə daxildir.
