Dövlət Gömrük Komitəsinin sədri, gömrük xidməti general-leytenantı Şahin Bağırov gömrük-biznes əməkdaşlığının gücləndirilməsi istiqamətində həyata keçirilən tədbirlərdən məmnunluq bildirərək, səmərəli və konstruktiv dialoqun münbit biznes mühitinin yaradılmasında, habelə iqtisadiyyatın inkişafında əhəmiyyətli rol oynadığını vurğulayıb.
Hazırda biznes nümayəndələri ilə müxtəlif platformalar üzərində işgüzar münasibətlərin qurulduğu və qarşılıqlı etimadın gücləndirilməsi istiqamətində atılan birgə addımların şəffaflığın, xidmət keyfiyyətinin artırılması, idxal-ixrac əməliyyatlarının asan və sürətli şəkildə həyata keçirilməsində mühüm rol oynadığı qeyd olunub.
Azərbaycan Sahibkarlar Konfederasiyasının prezidenti Məmməd Musayev isə dövlət-özəl dialoqunun uğurla inkişaf etdiyini vurğulayaraq, sahibkarlar tərəfindən qaldırılan məsələlərin operativ şəkildə həllində ikitərəfli şuraların və Dövlət Gömrük Komitəsi ilə Azərbaycan Sahibkarlar Konfederasiyası arasında yaradılan Əməkdaşlıq Şurasının müsbət rol oynadığını diqqətə çatdırıb.
Görüş zamanı gömrük dəyərinin müəyyən edilməsi, yerli istehsalı olmayan xammal və yarımfabrikatların gömrük rüsumları, geri qaytarılan mallar üzrə hesablaşmalar, mal nomenklaturası və ekspertiza təcrübəsinin təkmilləşdirilməsi, gömrük rəsmiləşdirilməsi, gömrük ödənişlərində təminat mexanizmi, “Yaşıl Dəhliz” buraxılış sistemindən daimi istifadə hüququnun əldə edilməsi və digər məsələlərlə bağlı müzakirələr aparılıb, sahibkarları maraqlandıran suallar isə ətraflı cavablandırılıb.
