İqtisadiyyat naziri Mikayıl Cabbarov “Sahibkarlar günü”nə həsr olunmuş “Sahibkarlığın inkişafı güclü iqtisadiyyatdır” mövzusunda tədbirdə çıxış edərək, mövcud iqtisadi inkişaf dinamikasında və qarşıda duran hədəflərin yerinə yetirilməsində sahibkarların rolunun danılmaz olduğunu vurğulayıb.
Nazir çıxışında “özəl sektor” terminindən istifadə etdiyini bildirib, çünki sahibkarlar fəaliyyətini məhz özəl sektorda – bəzi hallarda nəhəng dövlət şirkətləri ilə rəqabət şəraitində belə – həyata keçirirlər.
Cabbarov qeyd edib ki, Azərbaycanın ümumdaxili məhsulunda özəl sektorun payı ildən-ilə artır. Lakin bu göstəriciyə sadəcə rəqəm kimi deyil, səmərəlilik prizmasından baxdıqlarını vurğulayan nazir bildirib: “Özəl sektora yatırılan sərmayələrin qaytarılması və əlavə dəyər yaradılması əksər hallarda dövlət müəssisələri ilə müqayisədə daha verimlidir – iqtisadi terminlə desək, daha çox əlavə dəyər yaradır və daha səmərəlidir.”
Eyni zamanda, özəl sektorun resurslarının sonsuz olmadığını və həmin resurslara əlçatanlığın – istər sahibkarın öz kapitalı, istərsə də dövlətin dəstək alətləri olsun – ardıcıl sistem şəklində təmin edilməsinin diqqət mərkəzində olması lazım olduğu vurğulanıb.
İqtisadiyyat naziri ölkədə yeni iqtisadi artım modelinin yarandığını bildirib. O qeyd edib ki, əvvəlki model daha çox neft-qaz gəlirlərinin müxtəlif istiqamətlərə yönəldilməsi üzərində qurulmuşdu: “Dövlət geniş infrastruktur proqramlarını həyata keçirərkən belə, bu fəaliyyət dolayısı ilə sahibkar, özəl sektor vasitəsilə reallaşırdı.”
Lakin bugünkü çağırışlar yalnız iqtisadiyyatın diversifikasiyası və ya neft-qaz sektorunun ümumi iqtisadiyyatda 30% təşkil etməsi ilə bitmir. Yeni mərhələdə özəl sektorun fəaliyyəti yalnız dövlət sifarişləri ilə məhdudlaşmamalı, əsas məqsəd öz məhsulunun – xüsusilə ixrac bazarlarına çıxarılması olmalıdır.
Cabbarov vurğulayıb ki, Azərbaycan regionda ən sabit və asanlıqla proqnozlaşdırıla bilən iqtisadi siyasətə, sabit valyuta məzənnəsinə, sabit vergi rejiminə və sabit makrosiyasi-makroiqtisadi vəziyyətə malikdir. Ölkədə sahibkarlığın inkişafı bir neçə vacib mərhələdən keçdiyi də qeyd olunub.