NEQSOL Holding-in nümayəndələri mədən sənayesinin gələcəyinə, kritik minerallara və dayanıqlı sənaye inkişafına həsr olunmuş dünyanın ən böyük platformalarından biri olan Future Minerals Forum 2026-da iştirak ediblər.
GDP xəbər verir ki, Forum 13–15 yanvar tarixlərində Səudiyyə Ərəbistanının Ər-Riyad şəhərində keçirilib. Tədbir çərçivəsində hökumətlərdən, qlobal şirkətlərdən, maliyyə institutlarından və beynəlxalq təşkilatlardan 160-a yaxın lider bir araya gələrək kritik mineralların strateji əhəmiyyətini və onların qlobal iqtisadiyyatın gələcəyində rolunu müzakirə ediblər.
NEQSOL Holding forumda Səhmdarın baş məsləhətçisi və Müşahidə Şurasının üzvü Kirill Rubinski, Sənaye və Mədən üzrə rəhbər İsrail Asaliyev və Aparat rəhbəri Teymur Tağıyev tərəfindən təmsil olunub.
Rəsmi proqram çərçivəsində NEQSOL nümayəndələri “Mədən investisiyaları üçün qlobal kapitalın səfərbər edilməsi” adlı panel müzakirəsində iştirak ediblər. Paneldə hökumətlərin liderliyi və strateji tərəfdaşlıqlar vasitəsilə enerji keçidi, süni intellekt və tədarük zəncirinin dayanıqlılığı üçün vacib olan kritik mineralların təmin edilməsində qlobal kapitalın necə cəlb oluna biləcəyi müzakirə edilib.
Kirill Rubinski bildirib ki, belə tədbirlər uzunmüddətli çağırışların həlli üçün kapital və sənaye arasında əməkdaşlığın vacibliyini ön plana çıxarır. Onun sözlərinə görə, bazar şərtləri və investisiya prioritetləri dəyişsə də, dayanıqlı və intizamlı kapital bölgüsünün əsas prinsipləri dəyişməz qalır və qlobal maraqlı tərəflər arasında açıq dialoq xüsusi əhəmiyyət daşıyır.
Forum çərçivəsində NEQSOL Holding-in nümayəndələri Tasnee, Traxys, McKinsey və digər şirkətlərin təmsilçiləri ilə də bir sıra görüşlər keçiriblər. Bu görüşlər qlobal mədən və sənaye ekosistemində əməkdaşlığın gücləndirilməsi baxımından mühüm platforma kimi qiymətləndirilib.
Qeyd edək ki, NEQSOL Holding enerji, telekommunikasiya, yüksək texnologiyalar, tikinti və mədən sektorlarında fəaliyyət göstərən beynəlxalq şirkətlər qrupudur. Qrup 11 ölkədə fəaliyyət göstərir, 17 mindən çox əməkdaşı var və baş ofisi Niderlandda yerləşir. Portfelinə Nobel Energy, Nobel Upstream, Vodafone Ukraine, Bakcell, Azerconnect Group, Norm, UMCC Titanium və digər şirkətlər daxildir.
