Ölkənin ən çox vergi ödəyən irihəcmli beton istehsalçısı “Norm” şirkətinin Beton üzrə Texniki Məsləhətçisi Dr. Fikret Bayramov, “Lifli betonların təkamülü” adlı elmi əsərin həmmüəlliflərindən biri kimi Türkiyədə nəşr edilən kitabda yer alıb.
Kitabın birinci müəllifi Türkiyənin nüfuzlu təhsil ocaqlarından biri olan İstanbul Teknik Universitetinin (İTÜ) professoru, Prof. Dr. Mehmet Ali Taşdemirdir. Əsər, onun rəhbərliyi altında Türkiyədə dörd qurumda uzun illər ərzində aparılan elmi tədqiqatların və sənayedəki tətbiqinin nəticələri əsasında yazılıb. Nəşir prosesi, Türkiyənin qabaqcıl sement zavodlarından “Akçansa”nın təşəbbüsü və sponsorluğu ilə Türk Mühəndis və Memarlar Palataları Birliyinin İnşaat Mühəndisləri Palatası İstanbul Şöbəsi tərəfindən həyata keçirilib.
“Lifli betonların təkamülü” adlı kitab, xüsusi ilə polad lifli betonlar haqqında daha dərindən bilik əldə etmək istəyən tələbələr, araşdırmaçılar, layihə müəllifləri, inşaat mühəndisləri və bütün inşaat sektoru iştirakçıları üçün dəyərli bir elmi mənbə və istinad kitabı kimi qiymətləndirilir.
Bu beynəlxalq nəşr, “Norm” şirkətinin və onun mütəxəssislərinin yalnız istehsal sahəsində deyil, həm də beton texnologiyalarının inkişafı sahəsində elmi tədqiqatlarda və bilik paylaşımında aktiv iştirak etdiyini nümayiş etdirir.
