Azərbaycan kiçik və orta biznes subyektlərinin (KOB) rəqabət qabiliyyətinin artırılması, onların regional və beynəlxalq bazarlara çıxış imkanlarının genişləndirilməsi istiqamətində ardıcıl tədbirlər həyata keçirir.
Bu barədə Bakıda keçirilən İslam İnkişaf Bankı (IsDB) Qrupunun 51-ci İllik Toplantıları çərçivəsində çıxışı zamanı İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov bildirib.
Onun sözlərinə görə, Azərbaycanda fəaliyyət göstərən bizneslərin təxminən 99,7 faizini təşkil edən KOB-ların inkişafı dövlət siyasətinin əsas prioritet istiqamətlərindən biridir.
“Ölkəmiz Şərqlə Qərbi, eləcə də Şimalla Cənubu birləşdirən mühüm ticarət yollarının kəsişməsində yerləşir və bu mövqe ticarət, investisiya və biznes əməkdaşlığı üçün geniş imkanlar yaradır. Həyata keçirilən islahatlar və dəstək proqramları vasitəsilə sahibkarlığın gücləndirilməsi, ixracın artırılması, innovasiyaların təşviqi və KOB-ların xarici bazarlara çıxışının təmin edilməsi istiqamətində ardıcıl işlər görülür”, – deyə O. Məmmədov vurğulayıb.
KOBİA sədri qeyd edib ki, agentlik müəssisələrin rəqabət qabiliyyətinin yüksəldilməsi, rəqəmsal həllərin tətbiqinin təşviqi və yeni bazar imkanlarına çıxışının dəstəklənməsi istiqamətində fəaliyyətini davam etdirir.
O, həmçinin bildirib ki, qlobal iqtisadi əlaqələrin gücləndiyi bir dövrdə dayanıqlı və səmərəli tədarük zəncirlərinin formalaşdırılması üçün sərhədlərarası əməkdaşlığın genişləndirilməsi mühüm əhəmiyyət daşıyır.
“Birgə səylərlə ticarət maneələri azaldıla, iqtisadi əlaqələr möhkəmləndirilə və KOB-ların böyüməsi, yeni bazarlara çıxışı və uğur qazanması üçün daha əlverişli imkanlar yaradıla bilər”, – deyə Orxan Məmmədov əlavə edib.